No kjem det eige farevarsel for lyn

Lyn, hagl og vindkast kan skape problem. Frå onsdag sender meteorologane ut eigne varsel når det er fare for større lynhendingar.

Frå før sender Meteorologisk institutt mellom anna ut varsel om styrtregn.

Frå og med onsdag sender meteorologane også eige farevarsel om lyn og torevêr.

– Meteorologisk institutt har sett at mange torevêr kan få store konsekvensar, sjølv om kriteriet for styrtregn ikkje er oppfylt, seier meteorolog Geir Ottar Fagerlid.

Kan ha store følgjer

Lyn kan potensielt gi alvorlege følgjer som svært lokale vindkast og nedbør, kan starte brannar og påverke straumforsyninga og elektriske apparat, fortel meteorologen.

– Er det lett å varsle lyn og tore?

– Nei det er veldig vanskeleg. Vi har sagt at det må vere ei større torevêrshending før vi sender ut farevarsel. Så vi må vere ganske sikre på at det inntreffer, seier Fagerlid.

Derfor kan det skje at mindre lynhendingar ikkje blir sendt ut varsel om, legg han til.

Finst på gult nivå

Farevarsel finst vanlegvis i raudt, oransje og gult nivå, men farevarselet for lyn har berre eitt nivå – gult.

– Vi forventar at konsekvensane av lyn ikkje kvalifiserer til oransje eller raudt farevarsel, seier Fagerlid.

– Ved farevarsel for lyn – kva bør folk gjere?

– Det kan vere lurt å ta med i vurderinga viss du skal gå i fjellet eller gjere aktivitetar utandørs, seier Fagerlid.

– Du kan òg gjere førebyggande tiltak som gjer at effekten av toreveret ikkje blir like alvorleg, som å trekke ut kontakten til internett, legg han til.

Lyn kjem hyppigare

På grunn av klimaendringane varslar Meteorologisk institutt at det oftare blir lyn i framtida, saman med hyppigare og meir intense byer.

– Det er uvisse i framskrivingane av lyn, men det ser ut til å bli meir lyn om våren, vinteren og hausten framover. Om sommaren ser det likevel ut til at mengda lyn er uendra, seier Morten Køltzow ved Meteorologisk institutt.

– Dette er fordi auke i temperaturen tilfører meir energi til atmosfæren at vi får fleire hendingar som medfører lyn, forklarer Fagerlid.