Det er venta vanskelege køyreforhold i fjellet i Sør-Noreg tysdag.
Mykje nedbør, temperaturar rundt null grader og vind, gjer at Meteorologisk institutt tysdag føremiddag sende ut eit obs-varsel for Agder, Telemark og delar av Rogaland.
– Det vert kraftig vind mellom sør og søraust, noko som kan føra til at det samlar seg opp mykje snø og vert snøfokk enkelte plassar. Det er venta store lokale nedbørsmengder i form av våt snø eller regn, seier vakthavande statsmeteorolog Rafael Escobar Løvdahl.
Ifølgje varselet reknar ein med mellom 20 og 30 millimeter nedbør i området dei neste tolv timane.
- Følg med på situasjonen på vegane i Sør-Noreg her.
Rekn med kolonnekøyring
Dei som skal køyra i fjellet bør rekna med å bruka lenger tid enn normalt.
– Om du er i fjellet må du rekna med kolonnekøyring. Då er det dei vanlege forholdsreglane som gjeld: Full tank og mat i bilen, seier statsmeteorologen.
I Agder og Telemark kan det verta vanskelege køyreforhold ikkje berre i fjellet, men elles i indre strok. Lengst vest, i Rogaland, er det meldt opp mot sterk kuling 20.
Overvatn langs kysten
Det er òg fare for overvatn, spesielt i tettstadar og byområde.
– Langs kysten kan det verta snakk om lokalt overvatn. Derfor rår me folk om å reinsa kummar og avløp for snø og is, seier Løvdahl.
Meteorologane reknar med at situasjonen vil normalisera seg i løpet av kvelden, men at nullføre kan føra til glatte vegar lenger aust, i Østfold, Oslo og Vestfold natt til onsdag og onsdag morgon.