Kjell, som har eit naust i Nordhordland, spør:
– Det verkar om luftfuktigheita inne i naustet er høgare i oktober enn i mars (tørkar betre opp i mars). Naustet har same bruk i perioden. Kan dette vere riktig, og kva kan årsaka eventuelt vere?
Statsmeteorolog Kristin Seter:
Lufttemperaturen i mars og oktober er samanliknbar, så forklaringa her er ikkje så openberr.
Luftfuktigheita er derimot høgare om hausten, og det er ein kjend sak for mange at det er dårlegare «tørke» då enn om våren.
Ifølge min Bestefar måtte materialen vere stabla innan St. Hans, elles ville han ikkje tørke.
- Lurar du på noko om vêr og klima? Send spørsmålet ditt til meteorologen her!
Men kvifor er det fuktigare om hausten?
Mange faktorar kan spele inn her, men eg trur desse to er dei viktigaste:
1. Lågtrykk
Om hausten og om vinteren er det høgsesong for lågtrykk. Dei kjem som regel frå vest, og fører mykje fukt med seg. Vestlandet, der Kjell har naustet sitt, er midt i «skotlinja».
Fuktig luft ute vil også påverke luftfuktigheita innandørs, særleg i bygningar som ikkje er så godt isolerte, som naust, uthus og hytter.
2. Kaldt hav
Havet er på sitt kaldaste om våren. Det vert varma opp gjennom sommaren, og avgjer varme om vinteren. Havet held godt på varmen, og er derfor på sitt varmaste tidleg om hausten.
Det vil difor vere meir fordamping om hausten enn om våren. Dette bidreg til høgare luftfukt.
Eit naust ligg som regel heilt nede ved sjøen, så dette er truleg ein stor bidragsytar til inneklimaet i naustet.
Plantar som veks, syg til seg vatn
Mindre viktig, men kanskje likevel ein faktor, er sola. I mars står sola litt høgare på himmelen enn i oktober. Begge månadane har såpass lite sol at eg trur dette speler ei mindre rolle.
- LES OGSÅ: Så lang er eigentleg dagen
Det at bakken gjev frå seg varme og fukt på same vis som havet, kan og spele inn, men i mindre grad.
Vegetasjon kan også påverke, men kanskje ikkje i eit naust. Eg kan lite om dette, men far min, som er bonde, gjorde meg oppmerksam på at planter i vekst syg til seg mykje vatn. Dette bidreg nok til mindre fukt i bakken om våren enn om hausten. Grøne blad vil derimot kunne gje frå seg mykje fukt til lufta (meir enn ope vatn).
- Du kan lesa alle «Spør meteorologen»-sakene her!