Alt frå i morgon vil snøen begynne å smelte rundt om i landet, melder statsmeteorolog Susanne Reuder.
– Eg trur vi faktisk kan seie at våren er på veg. Det kjem framleis til å vere litt nedbør natt til onsdag, men frå torsdag ser det ut til å verte fint.
Store delar av landet kan sjå fram til ei veke med fint vêr.
– Men Nord-Norge kan framleis vente seg litt nedbør, med eit lågtrykk som kjem til å styre vêret fram til fredag, seier Reuder.
På Austlandet og Vestlandet sør for Trøndelag ser det ut til å verte fint og pent vêr. Også vinden er venta å roe seg.
Ikkje over for snøskredfaren
Jørgen Kvalberg frå Snøskredvarslinga ber folk vere obs.
– Varsom.no melder stor skredfare i ein god del regionar no, seier han.
Fleire stader i landet har no fint vêr og godt snøføre. Men det kan vere lurt å tenkje seg om før ein legg ut på tur i fjellet. Svake lag nedst i snødekket kan gi store eller svært store skred som kan losne naturleg eller fjernutløysast.
– Det er litt ekle og skumle forhold på grunn av dette, fortel Kvalberg.
Snøfokk med ny snø og vind i fjellet kan også føre til skred.
– Særleg i Nord-Noreg kjem det inn kraftig vind og ein del snø som skapar fokksnøproblem. Det vil seie snø som legg seg i hellingar som er lett å løyse ut for skiløparar når det er ferskt, seier Kvalberg.
Snøskredvarslinga oppfordrar til å følgje med på varslingane og å halde god avstand til skredterreng.
Solbrille-vêr
Kanskje vil det også vere mogleg å sette seg ut i solveggen og nyte april-sola.
– I låglandet kan vi vente 6–8 grader midt på dagen, som kjem til å stige til 9–12 grader seinare i veka. Kanskje vert det endå litt varmare i løpet av helga. Med litt sol til vert det veldig fint.
Meteorologen avsluttar med ei helsing:
– Det har vore ein kald vinter, så det er berre å nyte vêret framover.