Ei arbeidsveke står att før mange nordmenn pakkar takboksen og set kursen mot påskeferie. Uansett om du har tenkt å ta skiturar i litt ymse snø, eller du skal halda deg i låglandet, kan du gle deg.
GLADMELDING: Statsmeteorolog Geir Bøyum seier prognosane for påskevêret er einige. Dermed er dei også ganske sikre.
Foto: Bård Gudim / Meteorologisk institutt– Vêret kan vel ikkje bli betre, seier statsmeteorolog Geir Bøyum.
– Det er berre å finne ein passande solfaktor, og ein må ganske høgt på skalaen sidan påska er så sein, meiner han.
Bøyum uttalar seg om palmehelga, og så langt Meteorologisk institutt har prognosar framover, nemleg til onsdag før skjærtorsdag.
– Eit høgtrykk som ligg over heile det sørlege Skandinavia, og det fører til strålande vêr i store delar av Noreg kommande helg, og starten av neste veke, kan Bøyum avsløra.
– Truleg fint også i påskehelga
Frå sørlege delar av Nordland og i heile Sør-Noreg vil sola steike om dagen. Det vil den også i Aust-Finnmark og på Finnmarksvidda.
– Prognosane går fram til og med onsdag i påskeveka, og det er i grunnen meldt same type vêr heile tida. I tillegg er prognosane ganske sikre, seier Bøyum, som anslår at dagtemperaturen Austafjells vil liggje på mellom 15 og 17 grader.
– Det blir rett og slett ein kjempefin start på påska, varslar meteorologen.
– Kva kan du seie om korleis vêret kjem til å bli påskehelga?
– Det er sjølvsagt usikkert å seie noko om det no, men det er godt håp om bra vêr vidare utover i påska. Det er ingen tendensar til omlegging av vêret når påskehelga nærmar seg. Mogleg blir det noko meir nordavind, men det er vanskeleg å seie no, forklarar han.
Grått langs kysten i nord
Eit avgrensa område langs kysten i Nord-Noreg ser ut til å få eit noko meir grått vêr i palmehelga. Der kan det også koma noko nedbør.
– I nordlege delar av Nordland, i ytre Troms og i Vest-Finnmark kan det bli litt grått, med litt regn og sludd av og til, forklarar Bøyum.
Men han er rask med å presisera at Aust-Finnmark og Finnmarksvidda vil få fint vêr, akkurat som heile Sør-Noreg. Også indre Troms vil kunna få sol.
131 centimeter snø i Tromsø
Sjølv om påska kjem unormalt seint i år, vil det vera gode sjansar for deg som vil ut på ski. I nord er det kort sagt skiføre overalt. Måndag er det framleis 131 centimeter snø ved Meteorologisk institutt i Tromsø.
– Sett vekk frå sørlege Nordland, er det skiføre overalt i Nord-Noreg, fortel Bøyum.
I Sør-Noreg er det bart fleire hundre meter til fjells. Men kjem du deg over 500 meters høgd, kan du finna du snø også der.
HER ER DET SKIFØRE: På senorge.no kan du følge med frå dag til dag kvar det er mogleg å stå på ski utover våren. Men du har dårleg tid, snøen smelter raskt no.
Foto: senorge.no
