– Juni i fjor var veldig varm, så det er ikkje så rart om juni i år ikkje blir like varm, seier klimaforskar Erik Kolstad.
Sjølv om den første juniveka er solrik også i år, ser det ut til at temperaturen og nedbøren for heile månaden vil lande omtrent på snittet.
I fjor var den gjennomsnittlege døgntemperaturen i Bergen på heile 17,5 grader. Oslo hadde 18,8 grader, Bodø 13,9 grader og Tromsø 10,4 grader.
I år er sjansen størst for ein meir normal gjennomsnitts-døgntemperatur for juni sett under eitt. Rundt 13,5 grader i Bergen, om lag 15,5 grader i Oslo, om lag 10,5 grader i Bodø og om lag 9 grader i Tromsø.
– Denne første veka var varm, mens det blir litt kaldare veka etter. Førebels ser det ut som det totalt sett går mot ein normal juni månad, fortel Kolstad.
SOMMAR I NORD: I Bodø har innbyggjarane kunne kosa seg ute i strålande sommarsol ved inngangen til juni.
Foto: Synnøve Sundby Fallmyr / NRKFramleis høge temperaturar
Etter at den første helga i juni har hatt litt varierande vêr, ser det ut til at finvêret kjem tilbake mange stader komande veke.
– Frå måndag av blir det mykje bra vêr i heile Sør-Noreg. Det kan starte med litt nedbør i Midt-Noreg, men det ser ut som det går over til bra vêr etter kvart, seier statsmeteorolog Magnus Haukeland.
– Temperaturen i Sør-Noreg vil vere ganske bra. Det blir over 20 grader mange stader og på Austlandet 25 plussgrader, seier Haukeland.
I nord må folk belage seg på periodar med litt nedbør i starten av veka.
– I nord er det litt kjøligare, men måndagen er framleis ganske varm og etter det blir det opp mot 15 grader, fortel meteorologen.
VARME DAGAR: Slutten av mai og starten på juni har vore varm og solrik mange stader. Her frå Bygdøy i slutten av mai.
Foto: Terje Pedersen / NTB scanpixVarmaste sidan 1991
Kolstad leier forskingsprosjektet Climate Futures, der det no blir prøvd ut månadsvarsel og sesongvarsel som er basert på statistikk og vêrdata dei siste 30 åra. Varsla er ikkje å rekne som ei vêrmelding, men som det mest sannsynlege vêret samla for perioden.
Varselet for juni kom 20. mai og ser ut til å halde seg, fortel Kolstad.
Dermed blir det truleg ikkje varmerekordar, slik det var i fjor. Meteorologisk institutt tek utgangspunkt i perioden 1991–2020 når dei fortel om kva som er normalt vêr. Juni 2020 var den varmaste junimånaden i heile perioden etter 1991.
– Det er lite som tyder på at det skal skje igjen. Då må vêret vi har hatt fortsetje ut heile juni, seier Kolstad.
Julivêret er førebels for tidleg å seie noko om, legg han til.
