Akkurat no reiser John Smits og Eli Kari Gjengedal rundt i heile landet med «Værbitt», eit gedigent direktesendt vêrstunt. Og i mars kan det vere kaldt.
– Me frys, seier John Smits på telefon til yr.no
– Det bles skikkeleg og det er surt her. Me treng nye luer!
«Værbitt»-gjengen oppheld seg i dag, torsdag, på Hedmarksvidda og der er det grå, tett tåke, fortel Smits.
– Det er eigentleg eit flott område, men me ser det nesten ikkje slik vêret er no. I natt kom det mellom 5–6 cm med nysnø, og temperaturen ligg på rundt 0 grader. Så det er mildt. Men det bles godt, og no treng me noko på hovudet.
LES OGSÅ: Direkte inne fra - været
Smits søker lue
Dei som fekk med seg «Værbitt»-premieren på NRK1 søndag kl. 20.15, la truleg merke til dei mildt sagt iaugefallande hovudplagga til meteorolog John Smits.
No oppfordrar «Værbitt» folk til å sende inn fleire luer som Smits kan bruke under sendingane. Og dei må gjerne vere heimelaga.
– Me er ute etter luer i alle moglege fasongar. Det beste er heimelaga luer som er genuint eigenprodusert. Planen er å bruke alle luer me får i sendingane, med mindre me får tusenvis.
Smits er litt i manko på nye luer, og vil gjerne ha fleire frå «Værbitt»-sjåarane.
UTE I ALL SLAGS VÊR: John Smits, Eli Kari Gjengedal og resten av «Værbitt»-gjengen står ute i mange timar før kvar sending. No ønskjer dei seg fleire varme luer.
Foto: Sindre Skrede / NRKFØLG VÊRJAKTA: På YR.no si facebookside eller på Instagram.
Har fått luer i posten
Lue-stuntet starta med at ein venn av Smits la ut ei lue ho hadde strikka på Facebook.
– Den hadde motiv frå dei fire årstidene. Eple som fell frå tre, ein snømann og så vidare. Då tenkte eg: Oi! Ei slik lue kunne ha tenkt meg!, og skreiv ein kommentar til Synnøve Arnesen som hadde strikka lua.
– Du kan få den her!, skreiv ho då. To timar etter låg lua i postkassa. Så tenkte me at me kunne spørje om det er fleire som vil lage lue til oss, seier Smits.
NRK Luesentral tek i mot hovudplagg
– Me har oppretta ein eigen luesentral på NRK Hordaland. Her kan ein sende inn hovudplagg i alle variantar som me vil bruke i «Værbitt»-sendingane, seier meteorologen.
Han håpar på eit rikt mangfald av hovudplagg. Alt frå toppluer med dusk til ulike fargar og fasongar.
– Strikka, tova, hekla, me ønskjer oss alle typar. Men dei må helst vere litt varme. Me står jo ute i vêret mykje lenger enn dei 40 minutta som vert sendt på TV. Det blir fort nokre timar med førebuing ute.
– Det nyttar ikkje å stille i småsko. Me må kle oss etter vêret for ikkje å fryse. Og då treng me luer!
Har du lyst til å lage ei lue til John Smits? Då kan du sende den til NRK Hordaland, Pb. 7777, 5020 Bergen. Merk konvolutten "Værbitt".
