Hetebølgja avlyst - framleis «normal» norsk sommar

Eit høgtrykk over Russland med over 30 varmegrader treffer likevel ikkje Noreg. Her til lands blir det varierande den neste veka.

Ravnestadstøylen, juni 2021

TYPISK NORSK: Mange stader kan vente seg skiftande vêr med både sol, regn og skyer dei neste dagane. Som her frå Ravnestadstøylen i Gloppen tidlegare i juni.

Foto: Gro Ravnestad / NRK

For dei som elskar varmen skulle ein vore i Sør-Sverige. Der har det vore opp mot 34 grader og det kan bli opp til 34 plussgrader måndag.

– Akkurat no ligg det eit høgtrykk over Russland, og det ligg litt for langt aust for at vi får det varmaste vêret, seier meteorolog Charalampos Sarchosidis til NRK.

Laster Twitter-innhold

Før helga meldte meteorologane at også norske gradestokkar ville sjå 30-talet. No ser det likevel ikkje ut til at det varme vêret kjem hit.

– Det blir ikkje 30 grader her, men det er kanskje like greitt. For min del iallfall, ler meteorologen.

Men fortvil ikkje, litt varmt blir det i Noreg.

Skiftande i Nord-Noreg

– I Nord-Noreg har det vore nedbør og grått dei siste dagane, og dagane framover vil det bli litt av alt, seier Sarchosidis.

På tysdag og onsdag er det håp om godt vêr og 20 grader for Nordland og Troms og Finnmark.

Vidare utover veka blir vêret i nord korkje varmt eller kaldt, fint eller dårleg. Det skiftande junivêret held fram.

Sørlandet blir vêrvinnaren

På Austlandet blir det regn i dag og i morgon med ein temperatur på mellom 14 og 16 grader. Men allereie på kvelden i morgon vil det lette.

– Onsdag blir ganske sommarleg med 25 grader enkelte stadar. Det same gjeld på torsdag, seier Sarchosidis.

Når vi nærma oss helga er der ein fare for regn og kjøligare temperatur, spesielt på fredag.

– Det blir ein innedag, men laurdag og søndag ser bra ut, seier meteorologen.

Lengre sør i landet blir vêret stabilt fint og Sarchosidis nemner Agder som den store vêrvinnaren.

Resten av landet

Vestlandet og Rogaland får nokre lågare temperaturar enn i aust, men stort sett opphalds vêr.

– Det blir litt sommarleg, men gradene blir ikkje mykje høgare enn 20, seier meteorologen.

Møre og Romsdal og Trøndelag ser ut til å måtte utnytte tysdag og onsdag, for resten av veka ser våt og haustleg ut.

– Det blir ein del regn på fredag og helga ser heller ikkje bra ut, avsluttar Sarchosidis.