Her kan du sjå meteorsvermen i natt

Natt til onsdag har du sjansen til å sjå ein sverm av meteorar på nattehimmelen. Det kan skyte rundt 15 meteorar over himmelen kvar time.

Eit par ting må klaffe for at du skal få best mogleg utsikt til førestillinga på himmelen:

• Det må vere ganske klar nattehimmel med lite skyer
• Månen må stå slik til at den ikkje øydelegg med mykje lys. I år ligg den under horisonten, skriv astronom Jan-Erik Ovaldsen på bloggen Himmelkalerenderen.com.
• Ein mørk nattehimmel er bra, så prøv å unngå lysforureining frå by og bygd

Her er det størst sjanse for skyfri himmel

Vêret spelar dessverre ikkje heilt på lag for at vi skal få nyte meteorshowet.

Utanfor Vestlandet ligg eit lågtrykk og pumpar inn skyer og nedbør, og det er også venta byevêr i natt. Det kan hende du får sjå litt himmel av og til, men generelt blir det ikkje mykje klarvêr i natta som kjem på Vestlandet.

– I Møre og Romsdal og Trøndelag kan det vere litt lettare skydekke. Det er nok betre der, fortel Marianne Skolem Andersen ved vêrvarslinga på Vestlandet.

Lenger nord slit dei også med ein front som skal forbi i løpet av natta. Den dekker omtrent heile Nord-Noreg med skyer.

Austafjells har dei også svært vekslande vêr for tida.

Tilhøva ligg best til rette for klar himmel rett aust for Langfjella, i Telemark, Buskerud, Oppland og kanskje i Vestfold om ein er heldig, fortel statsmeteorolog Aurora Stenmark.

– Ein bør ikkje plassere seg i område der det ofte kjem tåke. For eksempel i dalstrøk der det samlar seg kald luft og lett blir fuktig.

På resten av Austlandet er det sannsynleg med mykje skyer, og Agder-fylka ligg dårlegast an for å få sjå klar nattehimmel.

Slik kan du bruke Yr

– Det er ingen meteorstorm, men verdt å få med seg dersom du likar stjerneskot. Venus, Jupiter og Mars dukkar også opp, skriv astronom Jan-Erik Ovaldsen.

Svermen av meteorane heiter Leonidane. Den kan best bli sett i timane før morgongry, men du har sjanse å få eit glimt heile natta. Dei kan vise seg over heile himmelen, og du treng ikkje stjernekikkert for å få auge på dei.

På Yr.no har vi nokre verktøy som kan hjelpe deg å sjå når tilhøva ligg best til rette for å sjå meteorane:

• Sjå skydekket slik det er akkurat no
• Følg med på prognosane for nedbør og skydekke på vêrkartet.

Les også: Gjør deg klar til meteorsverm i natt