Gladmelding til heile Sør-Noreg

– Det ser ut til at mange kan glede seg til onsdag, oppmuntrar Matilda Hallerstig, vakthavande meteorolog ved Meteorologisk institutt.

Onsdag og torsdag får heile Vestlandet og resten av Sør-Noreg smake på sommaren. I Bergen er det berre registrert ein dag med sommar i juli, men den statistikken kan i alle fall bli litt betre i løpet av denne veka.

– På onsdag vert det mykje sol i Bergen, og torsdag kan gradestokken stige til 25 grader, seier Hallerstig.

Fram med solhatten i Sør-Noreg

Har du sjanse til å ta deg fri denne veka ser det ut til at onsdag og torsdag er dagane du bør satse på. På heile kysten frå Stad og sørover til Stavanger vert det sol og gode temperaturar onsdag og torsdag. Møre og Romsdal og Trøndelag kan også sjå fram til skikkeleg sommarvêr med temperaturar opp mot 20 grader.

– Og dei plassane som ligg gunstig til kan heilt sikkert får temperaturar opp mot 25 grader, legg Hallerstig til.

Lenger sør i landet ser utsiktene gode ut for store delar av veka.

– Agder-fylka har ein litt skya start på veka, men med mykje sol mellom skyene. Også der vert vêret best onsdag. Mesteparten av Austlandet kan nyte solstrålar kvar dag fram til torsdag, fortel meteorologen.

Nord i landet vert vekevêret meir variert:

– Måndag er det fint i Aust-Finnmark, men det er ein front som passerer Nord-Noreg som vil gje gråvêr og regn måndags kveld og dagane framover, forklarar Hallerstig.

Utover veka kan finvêret treffe Nordland, då det byggjer seg opp eit høgtrykk i området som vil vare til helga. I Troms og Finnmark vil det derimot trekke inn skyer frå havet, og det vert fare for regn.

– Sørlege delar av Nordland vert finast torsdag. Fredag og laurdag vert det meir skyer, og søndag tettar det seg igjen.

Nyt sola medan du kan

Det etterlengta sommarvêret ser ut til å vere kortvarig. Etter torsdag vil temperaturen falle igjen på Vestlandet, og meir gråvêr og regn vil prege området. Dette gjeld også for Midt-Noreg og Sørlandet. På Austlandet kjem kanskje regnet allereie fredag.