Normal

Fredag får det finaste festivalvêret!

Det er festivalar i heile vårt langstrakte land til helga, men Sør-Noreg ser ut til å stikke av med det flottaste vêret.

A$AP Ferg på Slottsfjell 2014.

KNALLVÊR: Vert det Slottsfjell som får det beste festivalvêret i år?

Foto: Kim Erlandsen, NRK P3

Sommaren er høgsesong for festivalar, og helga byr på mange høgdepunkt. Det er festivalar over heile landet, frå nord til sør og aust til vest!

Nokre er meir heldige med vêret enn andre.

Laster Twitter-innhold

Slottsfjellfestivalen (Tønsberg)

Det ser ut som festivalen med dei historiske omgjevnadane trekker det lengste strået vêrmessig.

– Det er absolutt Slottsfjell som får det beste festivalvêret! Det vert nokre fine dagar på fredag og laurdag, seier statsmeteorolog Magni Svanevik.

Tønsberg går klar ettermiddagsbyene som pregar dei meir nordlege strøk i regionen. Vêret heldt fram med å vere varmt og tørt, og temperaturane vil ligge rundt 25 grader.

– Det kan verte litt tåke på morgonkvisten, men det er nok ikkje det viktigaste for festivalgjengarane!

Gladmatfestivalen (Stavanger)

Den største matfestivalen i landet ventar 250.000 gjestar, men vert vêret like bra som dei kulinariske opplevingane?

– Det vert finast vêr på fredag! På laurdag ser det ut som det kan verte litt meir skya. Det vert gråare og lette regnbyer. Utover søndag ser det ut som det held fram med å vere litt skya, men stort sett opphaldsvêr, seier Svanevik.

Sjølv i gråvêr kjem ikkje dei matglade gjestane til å fryse. Temperaturane vert rundt 20 grader. Det kan også verte litt tåke i morgontimane, men denne forsvinn utover dagen.

Gladmat

LIKE GOD: Maten er nok like god anten det er solskin eller gråvêr i Stavanger.

Foto: Anders Fehn / NRK

Malakoff Rockfestival (Nordfjordeid)

Det brakar laus også i Sogn og Fjordane, på ein festival som dreg folkemengder som langt overskrid folketalet i bygda. Tidlegare i veka vart fylket råka av eit kraftig uvêr. Det går heldigvis festivalfolket klar no til helga.

– Både fredag og laurdag ser veldig bra ut! Verken tore eller særleg vind. Søndag ser det ut som det kan verte litt gråare og nokre regnbyer, men relativt fint, seier Svanevik.

Er dei heldige i Nordfjord kan temperaturane krype heilt opp mot 25 grader.

Vinjerock (Eidsbugarden i Jotunheimen)

Skal du på festival i fjellheimen denne helga bør du pakke regnklede og støvlar. Det er ute eit farevarsel om kraftige regnbyer med fare for tore i områda frå Jotunheimen til svenskegrensa.

Det er vanskeleg å seie nøyaktig kvar byene hamnar, men det vert nok regn. Det kan bli vått både på fredag og laurdag, seier statsmeteorologen.

Sola kan gløtte fram i periodar, og på dagtid vil temperaturane vere rundt 17–18 grader. På festival 1060 meter over havet, må du likevel vere budd på at temperaturen om natta fell til mellom 9–11 grader, så ha gode sokkar i sekken!

Vinjerock 2017

HØGFJELLSFESTIVAL: Skal du på Vinjerock bør du passe på at teltet ditt er vasstett!

Foto: Arne Sørenes / NRK

Moldejazz (Molde)

I «rosenes by» er den eldste jazzfestival i Europa allereie godt i gang.

– Det ser ut som fredag vert ein god dag. Vi kan ikkje utelukke nokre ettermiddagsbyer, men det vert ikkje noko særleg regn, seier statsmeteorologen.

Både laurdag og søndag vert gråare dagar med skya vêr og regnbyer. Temperaturane held seg likevel opp mot 20 grader.

Buktafestivalen (Tromsø)

Etter ein juni som nesten regna vekk, så har juli verkeleg stråla i Nord-Noreg. Dei siste dagane har dei slått den eine varmerekorden etter den andre. Det ser derimot ut til at trenden er i ferd med å snu.

– Det er i nord det ser dårlegast ut med tanke på festivalvêret, dessverre, seier Svanevik.

Statsmeteorologen seier det vert regnbyer heile helga. Kystvêret kan også prege Tromsø med vind frå nordaust, og mogelegvis lågt skydekke.

– Ikkje noko å rope hurra for her, seier statsmeteorologen, men legg til at temperaturane ikkje vert så alt for ille.

Det vert opp mot 16–17 grader på dagtid, men det er lurt å ta med sydvest.

Telegrafbukta

IKKJE KNALLVÊR I VENTE: Verken for helga eller starten på neste veke ser det ut som Nord-Noreg får like rekordflott vêr som det har vore i nord dei siste par dagane.

Foto: Torgeir Skeie / NRK