Farevarsel om styrtregn på Austlandet

– Vi har sendt ut farevarsel på gult nivå om styrtregn dei to dagane, fortel statsmeteorolog, Geir Ottar Fagerlid, ved Meteorologisk institutt.

Det er eit lågtrykk sør i Nordsjøen som sender inn eit kraftig nedbørsfelt mot Austlandet. Det er venta at det kan kome mellom 15 og 25 millimeter nedbør på éin time.

– Vi veit ikkje sikkert nøyaktig kor denne nedbøren vil falle. Men førebels er det Østafjells som er mest utsett. Særleg i Langfjella fredag og laurdag, seier Fagerlid.

Farevarselet er sett til gult nivå. Det tyder «ver oppmerksam, dette blir utfordrande», og tilsvarer så å seie det gamle OBS-varselet. Neste farenivå er oransje før raudt som er ekstremvêr.

• Dette tyder fargekodane for ekstremvêr

– Pass på kjellaren din!

Meteorologen varslar ei omlegging av vêret på Austlandet når helga kjem. Nedbør blir det både fredag og laurdag. Men intensiteten kjem til å variera.

– Det vil falle nedbør over fleire timar, men på det mest intense kan det kome 25 mm på ein time. Det er så kraftig at det kan bli ein fare og eit problem for samfunnet, seier Fagerlid.

Nedbøren varer i for kort tid til at det er fare for flaum og skred. Men nokre stader kan styrtregnet føre til vatn i kjellarar og overvatn.

– Ja, på det mest intense kan nedbøren føre til problem med overvatn lokalt, før vatnet trenger ned i bekkar og elvar, forklarar meteorologen.

Austlandet åleine om regnet

I vêrvarselet for fredag og laurdag deler Sør-Noreg seg i eit unormalt skilje. Aust får regn og tore, vest får sol og opphald. I alle fall Nord-Vestlandet, og kysten vidare til Trøndelag.

– Fredag peikar seg ut til å bli ein svært varm dag. Særleg på Nordvestlandet. Der ventar vi fleire dagar med over 20 grader. Einskilde stader på Vestlandet eller i Trøndelag kan få oppi 25 grader, fortel Fagerlid.

Også lenger nord får ei tørr og mild veke med oppimot 20 grader.

– I Tromsø er meldt ganske fint haustvêr. Dei må berre komme seg forbi denne tysdagen, så får dei veldig mange fine dagar, seier Fagerlid.