Agnor Bertheussen spør:
– Kvifor verkar det som om sola varmar meir enkelte dagar enn andre. Sjølv om det er same lufttemperatur, same skysituasjon, sola står like høgt på himmelen, og ein sit i ein lun krok utan vind. På folkemunne kan ein høyre uttrykket: «i dag varma sola godt». Er det noko i det?
Statsmeteorolog Magni Svanevik svarar:
Ja, det kan faktisk vere slik at sola varmar meir enkelte dagar enn andre.
Kor varmt det blir ein sommardag avheng av dei faktorane som du nemner. Vind, skydekke og høgda til sola. Det er også varmare midt på dagen enn om kvelden, fordi sola står høgare på himmelen.
Men det finst andre, mindre kjende, faktorar som påverkar varmeeffekten frå sola.
Spesielle skyer slepp sola gjennom
Litt skyer kan faktisk gje sterkare solstråling enn om det er klarvêr. Dette kan skje dersom vi har skyer nær sola, men ingen som direkte skygger for sola. Då vil du få direkte stråling frå sola, i tillegg til stråling som blir reflektert i skyene og sendt vidare ned til jorda.
No vil du også merke at det blir veldig lyst, og utan solbriller kan ein føle seg blenda.
Forureing gjer sola svakare
Partiklar frå forureing kan sveve rundt i lufta og hindre at solstrålar når oss. Dette har ein negativ effekt på den direkte strålinga frå sola.På dagar med mykje partiklar i lufta kan du føle at sola er svakare.
- Lurar du på noko om vêr og klima? Send spørsmålet ditt til meteorologen her!
Når det er lite partiklar i lufta, og vi har skikkeleg klar luft, vil nettene bli kaldare på grunn av større utstråling. Når sola kjem tilbake om morgonen, vil vi få mykje direkte stråling nettopp på grunn av at det er lite partiklar i lufta.
Kontrasten frå den kalde lufta rundt oss og mykje direkte solstråling vil gjere at det kjennest ut som om sola varmar mykje.
Tørr luft kjennest kaldare
Tenk deg at du ligg på stranda og steiker i sola. Det byrjar å bli frykteleg varmt, nesten uhaldbart. Til slutt må du gi etter, og hoppe i vatnet for å avkjøle deg. Du legg deg til rette igjen, du føler deg frisk og avkjølt. Men det tek ikkje lange stunda før du er heilt tørr igjen. Du blir varmare og varmare, og den same prosedyren gjentar seg.
Når du er blaut, bruker kroppen energi, altså varme, på å fordampe vatnet, og du vert avkjølt. Det same skjer når du sit på terrassen din og sveittar.
Dette er kroppen sitt geniale kjølesystem. Men, dersom lufta allereie er full av vassdamp, vi seier at lufta er metta, vil det skape problem for kjølesystemet vårt. Du vil ikkje få den same avkjølande effekten.
Det er dette vi kallar følt temperatur. Det kan beskrivast ved ein varmeindeks.
Det er ikkje nødvendigvis ein vitskapeleg grunn til at sola kjennast varmare ut somme dagar. Korleis ein kjenner varme på kroppen er subjektivt, og det kan rett og slett hende at du berre er litt varmare ein dag.
- Du kan lesa alle «Spør meteorologen»-sakene her!