Tjukk skodde stoppa ferje og flytrafikk – held finvêret skjult på kysten

Store delar av landet ligg denne veka bada i finvêr.

Men for mange starta dagen med tjukk tåke fleire stader langs kysten.

– Tåka kjem til halde seg fram til i morgon kveld. Då håper vi at ho vil løyse seg opp att, seier statsmeteorolog Susanna Reuder.

I dag tidleg blei ein del av ferjesambandet Leirvåg-Sløvåg innstilt på grunn av tåke. Det same gjorde Fedje-Sævrøy. Og den tjukke tåka har også ført til for fly- og helikoptertrafikken i Florø, der sikten har vore om lag 800 meter på flyplassen.

– Det har ikkje vore trafikk på flyplassen sidan i går kveld, seier flyplassjef Siv Merete Stadheim tysdag føremiddag.

Metta med vassdamp

Tåke er veldig fuktig luft som inneheld store mengder med fukt, altså metta med vassdamp.

Tåke på denne tida er ikkje heilt uvanleg. Statsmeteorologen fortel at det er ganske typisk om våren når sjøen er relativt kald.

– Tåka oppstår når varm og fuktig luft som vi har no har no frå land,
blir transport utover kaldare hav. Havet avkjøler den varme lufta slik at lufta blir meir tett med vassdamp og det blir danna tåke. Det er ganske så typisk ved kysten, seier Reuder.

Ber folk vere obs

I løpet av dagen når sola varmar opp, vil tåka løyse seg opp. Men til kvelden og i løpet av natta kjem tåka tilbake langs kysten. Ifølgje yr.no vil det vere tåke frå Rogaland og nordover langs heile kysten i morgon.

– Det er meldt tåke i kveld og fram til i morgon, Litt vanskeleg å seie kor lenge det er tåke om morgonen, for det er veldig lokale forhold. Tåka kan løyse seg opp tidleg, eller den kan halde seg lenge.

Sikten blir både dårleg og kort og temperaturen søkk. Dette ber Reuder folk om å vere obs på.

– Folk må passe på når dei går på fjellet eller reiser ut med båt. Det er viktig å vere klar over at sikten kan bli dårleg og at det blir kaldare, seier ho.

I Bergen kunne turgåarar som var tidleg oppe på byfjella i går, oppleve ei spesiell stemning, med kaldvêr og dårleg sikt nede – og varme og strålande sol over det låge skydekket. Og slik kan det altså bli fleire plassar langs kysten desse fine dagane.