Ber folk merke og sikre lause gjenstandar

– Vi får dagleg melding om funn av jollar, kanoar, og kajakkar som driv langs kysten, spesielt når det er uvêr, seier redningsleiar Torgeir Espedal i Hovudredningssentralen.

Det er meldt kulingvarsel frå rundt Stad og nordover langs kysten til Nordkapp, og då aukar faren for at farkostar kjem på avvegar.

Først i vest, så i nord

– Det bles stiv kuling med sørvestleg retning på vinden langs kysten frå Stad og utanfor Møre og Romsdal til Frøya. Vinden vil òg auke lenger nord i morgon frå Melbu til Nordkapp, seier statsmeteorolog Anne Solveig Andersen.

Ho fortel vidare at det vil auke frå stiv til sterk kuling, og at det vil bli signifikant bølgjehøgde på rundt fire eller fem meter på laurdag.

– Om ein har lause gjenstandar langs med kysten, vil eg anbefale folk å feste dei, oppfordrar statsmeteorologen.

Difor ber Hovudredningssentralen alle eigarar av kano, kajakkar, SUP-brett og ikkje registrerte båtar/joller om å merke desse med namn og kontaktinformasjon.

Innsatsleiar for Vest politidistrikt i Sunnfjord, Joachim Malterud, deler oppmodinga til HRS.

– Det blir mykje lettare for politiet og andre nødetatar og kunne avklare om dette er ein reell nødsituasjon eller om det berre farkostar som har drive, seier Malterud.

Blir ikkje mindre på drift

Dårleg sikring utløyser kvart år mange redningshendingar for å sjekke at det ikkje er folk involvert.

– Det blir brukt mykje ressursar på å finne drivande gjenstandar, seier Espedal ved HRS.

Merk båtar, kajakker og brett med namn og nummer, oppfordrar han.

– Det einaste vi treng er eigentleg eit telefonnummer til dei som eig det for å sjekke at dei har det greitt.

Kajakkar og kanoar er det som toppar lista av gjenstandar som driv, ifølgje Espedal. Spesielt langs kysten frå Stad og til Oslo finn Hovudredningssentralen farkostar på avvegar.

– Mitt inntrykk etter å ha jobba her i tre år er at det ikkje blir nokre mindre av det. Det er eigentleg litt mystisk at folk ikkje er meir interesserte i å merke tinga sine.