Det blir ein klissvåt start på veka i Midt- og Nord-Noreg, medan dei i sør kan nyte sol og fine temperaturar.
– Forskjellane i vêret er brutale, seier meteorologen om starten på den første veka i november.
– Det blir ein «Roar» light
Det er litt styr i Trøndelag no, fortel statsmeteorolog Geir Ottar Fagerlid. Der har det regna godt i helga, og det neste døgnet er det venta 50 mm til.
Det er så mykje at meteorologane har sendt ut OBS-varsel. Meorologen fortel at situasjonen er ganske lik som når ekstremvêret Roar ramma Trøndelag og Nordland i slutten av september.
- Følg med på NVE sitt flomvarsel.
– Situasjonen lignar på «Roar», med litt mindre nedbør. I tillegg blir det mykje vind. Nedbør og vind heng ofte saman, fortel Fagerlid.
Det går eit brutalt vêrskille ved Trondheim. Medan det er lite skyer og sol sør for byen, er det mykje nedbør nord for Trondheim. Det er òg venta liten til full storm langs kysten. Vinden vil merkast langs kysten ned til Stad.
Meteorologen fortel at grunnen til dei store forskjellane er veldig milde luftmassar mellom Storbritania og Frankrike, og kald luft i nord.
Frå tysdag blir det betring. Sett vekk i frå litt yr i lufta tysdag og torsdag, blir vêret for det meste bra i vest. Trøndelag får også tid til å tørke opp.
– Eg vil kalle denne veka relativt fin. Eg er optimist! Trøndelag får framleis litt nedbør tysdag og onsdag, men langt mindre enn søndag og mandag, avsluttar Fagerlid.
Også grunn til å vere OBS i Nordland
Også i Nordland er det venta 50 mm på eit døgn mandag til tysdag. Og nord i landet er det den stilen vêret held denne veka, kan meteorologen melde.
– Det blir kjøligare og ein del nedbør frå onsdag av, i heile nord. Ikkje så mykje som det har vore, men det blir nedbør som byer også i Troms og Finnmark, fortel Ola Mellem ved vêrvarslinga i Tromsø.
Med kjøligare luft kan nedbøren komme som sludd eller snø. Utover veka blir det stadig lettare vêr frå sør, og fredag kan sjå rett fram fint ut.
– Fredag bygger det seg opp ein slags hgøtrykksrygg over Finnmark, så det er mulig fredag blir bra.
Den tørre tida held fram i aust
Oktober vart rekordtørr i Oslo, og starten av november held fram i same stil. Austafjells er det venta lettskya og opphald dei første dagane.
– Men det kan vere ein del vind i fjellet i starten av veka, åtvarar Mariann Kløvereid Foss ved meteorologisk institutt i Oslo.
Kort oppsummert blir det tørt og overskya mandag til onsdag aust og sør i landet.
– Det er litt større sjanse for litt regn i lufta torsdag og fredag, avsluttar meteorologen.