– Ikkje noko å juble over

Ingen sommar i vente, ifølgje meteorologane.

Dårleg sommarvêr for skuleborn som har skulefri.

VÅT START PÅ FERIEN: Regn, vind og fare for torevêr oppsummerer vêret i dagane framover.

Foto: Gorm Kallestad / NTB scanpix

Vi er komen til det mange skuleborn lenge har sett fram til: sommar og skulefri. Men statsmeteorolog Mariann Foss kan ikkje love sommarvêr med det første.

Mariann Kløverød Foss

Statsmeteorolog Mariann Foss melder vêret for helga og komande veke.

Foto: Marit Hommedal

– Starten på sommarferien vert ikkje noko å juble over, stadfestar ho.

Ustabil helg

Todelinga av vêret på sankthans seier også mykje om tilstandane som ventar landet til helga; vått i sør og tørt og kaldt i nord.

Værkart Noreg Laurdag 24 juni

Vêrkartet for laurdag viser lågtrykket i Norskehavet.

Foto: Yr

Det er lågtrykket i Norskehavet som vil legge ein dempar på sommarstemninga i heile landet.

Lågtrykket vil gje regn og vind i Sør-Noreg til og med Trøndelag, og til tider også Nordland. Troms og Finnmark slepp unna det verste regnet.

– Men der vert kjølig, tilføyer statsmeteorologen.

Fare for torevêr

I tillegg til vind og regn, er det på søndag meldt om fare for lyn og tore på Austlandet laurdag, og på Vestlandet søndag.

Laster Twitter-innhold

Neste veke: Ingen høgtrykk i vente

For dei som håper på sol og sommar i neste veke, har meteorologen meir dårleg nytt. Regn og vind vert også stikkord for komande veke.

– Det er ingen høgtrykk på gang etter helga og vi vil vente oss meir ustabilt sommarvêr.

Mariann Foss har kontor i Oslo og fortel at vêret ikkje vil spare den austlege landsdelen som ofte hamnar i le for regnet.

– Lågtrykket har ikkje ein gunstig posisjon. Det går i ei sørleg bane som gjer at også Austafjells får regn, ikkje berre Vestlandet, forklarar Foss.

Dei regnvåte vestlendingane står dermed ikkje åleine om å måtte pakke med seg paraplyen. På den andre sida finst der meir håp om varme Austafjells, som mellom regnbyene kanskje vil oppleve opphaldsvêr og temperaturar opp mot 20 grader.

Nord-Noreg får også innslag av regn, men med meir forbigåande byer som gir lengre periodar med opphaldsvêr og glimt av sol. Men ingen knallvarme.