Sidan lanseringa av yr.no har vi fått svært mange førespurnader etter ein eigen mobilversjon av sidene. No er mobilversjonen lansert, opne m.yr.no frå mobiltelefonen din!
Betre animerte kart
Dei animerte karta er noko av det mest populære innhaldet på yr.no, og vi får svært mange positive tilbakemeldingar om dei. No har vi gjort nokre små grep for at dei skal vere lettare å bruke:
- Start/stopp-knapp. Dersom du trykkjer på stopp-knappen ein gong, vil ingen av dei animerte karta på yr.no starte automatisk meir. Du kan lett starte karta på nytt ved å trykkje på den blå start-knappen (play).
- Klikkbare stadnamn. No kan du klikke på alle namna som ligg inne i kartet – det gjer at det er lettare å sjekke vêret mange stader på ein gong.
- Vindpil. Vi har lagt til ei vindpil der du kan sjå vindretning og styrke (jo fleire taggar det er på pila, jo sterkare vind blir det!).
Fjerna observasjonar
Tidlegare viste vi observasjonar på svært mange av sidene på yr.no. Ein observasjon er ei faktisk måling frå ein målestasjon, i motsetning til ein prognose som er eit varsel om korleis vêret skal bli.
Vi har sett på tilbakemeldingar og brukartestar at dei fleste brukarane av yr.no ikkje er så interesserte i observasjonar – dei fleste vil vite korleis vêret skal bli, ikkje korleis det har vore. I tillegg såg vi at mange misforsto observasjonane, og trudde at prognosane var laga for dei same målestasjonane.
Inntil vidare har vi difor fjerna observasjonar frå mange sider på yr.no. Om kort tid kjem det eit nytt og langt betre observasjonstilbod, der dei som er interesserte kan sjå alle observasjonar frå heile landet samla på éi side!
Litt betre søk
Vi held på å jobbe med søket, og håpar at vi får lansert ein langt betre versjon av søket i desember.
I denne versjonen av yr.no har vi gjort bittelitt for å få betre sortering og rekkefylgje når du søkjer etter utanlandske stadnamn, men det står framleis att mykje før søket er i tipp-topp-stand!
Legg gjerne inn kommentarar og tilbakemeldingar til oss nedanfor!
