17. mai-vêret: – Ha paraplyen klar

Trønderane ser ut til å stikke av med det beste vêret på nasjonaldagen. I resten av landet kan det vere lurt å finne fram noko som kan skjerme for regnet.

17. mai i Lærdal

BUNADEN PÅ: Bjørghild Holien og Kristin Evensen i fin Valdres-bunad og med paraply under 17. mai-feiringa i Lærdal.

Foto: Jan Chr. Jerving

– Ha paraplyen klar, er meldinga frå statsmeteorolog Lars Andreas Selberg ved Vêrvarslinga på Vestlandet.

Når han ser på prognosane for 17. mai, så er det framleis mykje uvisse å spore. Små lågtrykk aust og vest for Noreg kan forstyrre stemninga både her og der.

– På Austlandet er det utrygt for skyer og nedbør. Førebels ser det ganske vått ut for 17. mai i Oslo. Det blir truleg skya vêr og jamt og trutt med nedbør, seier Selberg til NRK.

Men han har eit håp om at lågtrykka spelar prognosane eit puss, og at det kan bli opphaldsvêr mange stadar også.

Særleg ligg Trondheim og Trøndelag godt an i løypa om å få det beste 17. mai-vêret.

– Slik det ser ut no så ligg det an til godt vêr, frålandsvind og gode temperaturar der, seier Selberg.

Men meteorologen vil ikkje love noko sikkert. Lågtrykk i Atlanterhavet og ved Finland kan styre 17. mai-vêret i fleire retningar.

– Vi får nyte godvêrsdagane mange får før 17. mai, konkluderer han.

17. mai-feiring på Sortland.

VÅT VELKOMST: 17. mai-feiring på hurtigrutekaia på Sortland.

Foto: Mary Ann Holm

Slik ser prognosane ut for nasjonaldagen:

Austlandet og Sørlandet:

  • Skya vêr, stor sjanse for nedbør.

Vestlandet:

  • Opphaldsvêr, men fare for regnbyer utover dagen.

Trøndelag:

  • Opphaldsvêr og frålandsvind

Nord-Noreg:

  • Fare for nedbør, men austavind kan føre med seg opphaldsvêr.