Ein regnboge midt på natta?

Spør meteorologen

Foto: Marit Hommedal

• I dag er det statsmeteorolog Haldis Berge som svarer.
• Send dine værspørsmål til yrmeteorologen@met.no

Sonja har sendt e-post til yr-meteorologane og lurar på om lyset frå månen kan lage ein regnboge.

Denne veka er det yr-meteorolog Haldis Berge som svarar:

Ein måneboge

Ja, ein kan sjå regnboge om natta også. Dette kallar ein for måneboge.

Den blir danna på same måte som regnbogen men av månelyset i staden for sollys.

Slik blir månebogen danna

Månebogen blir danna ved at månelyset, som er reflekterte lysstrålar frå sola, bryt i regndråpar.

Det er fleire føresetnader som må vera til stades for at ein måneboge skal kunna oppstå:

• Månen må vera full, eller nesten full.
• Månen må vera bak deg, og du må ha regndråpar framfor deg.
• Himmelen må vera mørk.
• Månen må vera mindre enn 42 grader over horisonten.

Med alle desse føresetnadene seier det seg sjølv at ein ikkje ser månebogen så ofte.

Eit sjeldan fenomen

Månebogen er altså eit sjeldan fenomen. Hovudårsaka til at månebogen er sjeldan er at månelyset er mykje svakare enn sollyset.

Månebogen vil ofte sjå kvitaktig ut. Dette er fordi månelyset er for svakt til at auga vil klara å oppfatte fargane i månebogen.

• Les fleire artiklar frå «spør meteorologen»
• Har du verspørsmål? Send e-post til meteorologen!