Snøen har kome på Sognefjellet

Statens vegvesen melder at det har kome snø over 1300 meter. Det er null grader og byger i lufta.

Råmund Mundhjeld som driv Sognefjellshytta, fortel om slaps i vegen og at brøytebilen nettopp køyrde forbi. Men det er ikkje heilt uvanleg med snø så tidleg på hausten.

– Vi får ofte eit snøfall i månadsskifte august/september. Eg reknar med at de blir ein del snø framover, seier han til NRK.no.

• LES OGSÅ: No kjem hausten for fullt
• LES OGSÅ: Vakna opp til snø i fjellet

Må leggje om planane

Hytta ligg på 1400 meter, medan det høgste punktet på Sognefjellsvegen er på 1434 meter. Mundhjeld seier det er kvitt på fjellet og at det framleis snør no i føremiddag.

– Ei gruppe med gjestar som er på hytta i dag, må leggje om turplanane sine på grunn av snøen.

Men sjølv om det kjem snø tidleg i september, reknar ikkje Mundhjeld med at skiløypene er klare før i oktober.

• Her finn du oppdatert vervarsel for Sogn og Fjordane

(Artikkelen held fram under biletet)

ANDRE PLANAR: Gjestene ved Sognefjellshytta må leggje om turplanane sine i dag.

Foto: Sognefjellshytta

50 mm nedbør

Statsmeteorolog Gunnar Livik ved vêrvarslinga på Vestlandet, seier det har vore mykje vind og ruskever det siste døgnet.

– Det blir mykje rolegare i dag, Vinden vil minke frå vestleg stiv og sterk kuling i morgontimane. Den vil gå over til nordvest liten kuling og i kveld blir det frisk bris.

I går var det enkelte stader opp mot 55 mm nedbør, medan dei fleste fekk 20–40 mm.

– Det er ganske store mengder det også. Dei verste frontane passerte i går. I dag går det over til regnbyer og det blir færre av dei.

• Slik ser det ut på vegane

Lågtrykk i kø

Det kjem ein høgtrykksrygg i løpet av kvelden, og det blir skiftande skydekke og kanskje gløtt av sol. Livik seier temperaturen har sunke ganske mykje sidan i går.

– Vinden har dreidd mot nordvest og då kjem det kjølige luftmassar. Dermed blir det ein del kjøligare. Men lågtrykka ligg i kø og utpå torsdagen kjem det inn eit nytt lågtrykk. Då blir det igjen store nedbørsmengder.

Statens vegvesen melder at dei ikkje har fått inn andre meldingar om problem på vegane i Sogn og Fjordane.