Fin start på helga i heile landet

Haakon Melhuus har gode nyheiter til dei som ventar på sola.

Foto: Kaland, Ole/Ole Kaland, NRK

– Fredag og laurdag ser ut til å bli fine dagar, seier statsmeteorolog Haakon Melhuus som har oversikt over korleis vêret blir framover.

Men fram til helga, må dei fleste sjå langt etter sola.

Byger i heile landet

Onsdag vert det regnbyger over heile landet, flest på Vestlandet, Trøndelag og i Nord-Noreg. På Austlandet vert det periodar med sol, men også her er det venta ein del nedbør.

Og verre skal det bli.

– Natt til torsdag kjem det eit kraftig lågtrykk innover oss, fortel Melhuus.

Det kan gje stiv og til dels sterk kuling i høgfjellet nord for Sogn og Lillehammer. Det òg denne delen av landet som vil merke aller mest til nedbøren.

• Følg med på regnbygene på vêrradaren.

Heile landet må førebu seg på regnbyger i dagane framover, men helga kan bli fin.

Foto: Johannessen, Sara/SCANPIX

Kortvarig

I Finnmark vil det kome svært mykje regn i innlandet og dei sørlege delane av fylket på torsdag. Medan Troms ser ut til å sleppe unna den verste nedbøren, vert det grått og vått også i Nordland.

Det positive er at det går fort over.

Etter eit døgn med mykje regn i Midt- og Nord-Noreg, skin det opp att til helga. I alle fall sør for Troms.

– Fredag kan bli ein fin dag over heile landet, seier Melhuus.

Det vert høgare temperaturar og sol, først i sør, men etterkvart vil det bli lettare vêr også i Troms og Finnmark.

• Sjekk badetemperaturen der du er!

Best i nord

Laurdag er det dei midtre og nordlege delane av landet som ser ut til å få det beste vêret.

– Nord for Stad og Dovre vert det mykje pent vêr. Laurdag og søndag kan det bli godt over 20 grader både i Trøndelag og lenger nord, fortel Melhuus.

I Sør-Noreg ser det derimot til å bli grått igjen etter ein fin start på helga. Det er venta regnbyger både på Austlandet, Agder og Telemark, samt på Vestlandet frå Bergen og sørover.

– Laurdag kan det kome ein god del nedbør Austafjells, seier Melhuus.

Nedbøren fører òg til lågare temperaturar.

Meir regn i vente

Utover i neste veke, er det så langt ikkje noko finvêr i sikte.

Prognosane er samansette, men det ser ut til at heile landet må førebu seg på at det igjen kan bli ein periode med gråvêr.

Det ser ut til at heile landet må førebu seg på meir gråvêr i neste veke.

Foto: Jan Gulliksen/NRK