Normal

yr.no nominert til Webby Awards

yr.no er nominert som «official honoree» til den prestisjefylte amerikanske nettprisen Webby Awards.

Webby Awards Official Honoree logo
Foto: Webby Awards

yr.no er nominert i kategorien «Services» , og er den einaste skandinaviske nettstaden som er «official honoree» i denne kategorien.

Webby Award er den kan hende største og mest kjende nettprisen i verda. Prisen i år er den tolvte i rekka, og sjølve prisutdelinga skjer i New York 10. juni.

10 000 nettstader frå over 60 land vart meldt på til Webby Awards i år, av desse vart om lag 1500 plukka ut som «official honorees». Det blir delt ut prisar i meir enn hundre kategoriar.

Nettstader som tidlegare har vunne Webby Awards er mellom anna Amazon.com, eBay, Yahoo!, iTunes, Google, BBC News, CNN, The New York Times, Wikipedia og Flickr.

Tre prisar til yr.no i fjor

yr.no vann tre norske prisar i 2007:

  • Rosingprisen for beste nett-teneste, delt ut av samferdsleminister Liv Signe Navarsete.
  • Språkprisen for god språkbruk på nett (ein av Rosingprisane) frå Dataforeningen og Språkrådet, delt ut av Sylfest Lomheim.
  • Prisen for beste offentlege nett-teneste, frå noreg.no og Fornyings- og administrasjonsdepartementet.


yr.no vart lansert 19. september i fjor og er eit samarbeid mellom NRK og Meteorologisk institutt. Nettstaden har blitt svært populær på kort tid: Opp mot 800 000 unike brukarar er innom yr.no kvar veke.

yr.no er unik i europeiske samanheng, med svært detaljerte varsel og ein open datapolitikk. yr.no tilbyr mellom anna time-for-time-varsel og 10-dagarsvarsel for 700 000 stader i Noreg i tillegg til varsel for 6,3 millionar stader i utlandet. Alle som vil, kan laste ned data frå yr.no og bruke desse på eigne nettsider eller på andre måtar.

Last ned gratis vêrdata frå yr.no