Nedbøren i månaden som akkurat er unnagjort blei 160 prosent av normalen. Normalen er 100 prosent, så dermed fekk vi 60 prosent meir regn enn normalt.
Det gjer årets august til den nest våtaste av alle i serien som går heilt tilbake til målingane starta i år 1900. Det var berre august 1951 som hadde meir nedbør. Den gongen enda månadsnedbøren på 165 prosent av normalen.
Jostein Mamen, klimaforskar ved Meteorologisk institutt.
Foto: met.no– Det er riktig så vått. Den nest våtaste månaden ever. I tillegg fekk vi varmerekordane i Troms og Finnmark, fortel Jostein Mamen, klimaforskar ved Meteorologisk institutt.
Bøtta ned i vest
Men det er ikkje alle bøndene som har fått hjelp frå oven etter den knusktørre sommaren. Sjølv om målestasjonar andre stader i landet fekk både to og tre gongar meir nedbør enn vanleg til august å vere, var det målestasjonar i Østfold, Akershus, Vestfold og Aust-Agder, som berre fekk halvparten av normal nedbør.
Mest regn:
- Kritle (Etne, Hordaland) 468,8 mm
- Gullfjellet (Bergen, Hordaland) 439,3 mm
- Brekke i Sogn (Gulen, Sogn og Fjordane) 434,9 mm (161 % av normalen)
SLAPP UNNA: Torungen fyr utanfor Arendal fekk under halvparten av normal nedbør i august.
Foto: Erik Wiig-Andersen / NRKMinst regn:
- Nøtterøy Knarrberg (Færder, Vestfold) 33,7 mm
- Torungen fyr (Arendal, AustAgder) 34,7 mm (42 % av normalen)
- Gardermoen (Ullensaker, Akershus) 35,4 mm (39 % av normalen)
(Kritle, Gullfjellet og Nøtterøy har ingen normal enno. Målaren skal ha vore i drift i 30 år for å ha ein normal.)
SVÆRT VÅT AUGUST: Slik fordelte regnet seg over Noreg i august 2018. Store delar av landet fekk meir nedbør enn normalt, medan området rundt Oslo-fjorden og til Sørlandet fekk mindre enn vanleg.
Foto: senorge.no
KONSEKVENSAR: I Bergen regna det så mykje i august at denne midlertidige demningen i Munkebotn til slutt ikkje tolte meir.
To varmerekordar i nord
Høgaste temperatur blei sett på Banak i Finnmark allereie 1. august. Den dagen blei det målt 32,8 grader der, noko som var ny fylkesrekord for Finnmark. Same dag sette Skibotn fylkesrekord i Toms med 32,4 grader.
REKORD: Banak har sett varmerekord i Finnmark både i august og september.
Foto: Simon Piera Paulsen / NRK– Det var tropevarmen denne sommaren som også varte inn i august, seier Mamen.
I heile landet hamna august-temperaturen 0,6 grader over normalen. Men Finnmark utmerka seg med fleire stasjonar oppimot to grader varmare enn vanleg.
Kaldast? Det var Filefjell-Kyrkjestølane i Oppland med -4,5 grader den 13. august.
Sommarvarmen fortset
– September oppfører seg også foreløpig som ein sommarmånad, seier statsmeteorolog, Geir Ottar Fagerlid.
Tre dagar inn i årets september fortsette Banak i Finnmark å knuse rekordar. Denne gongen nok ein varmerekord. Den nye september-rekorden er 25 grader, og blei målt om ettermiddagen den 3. på Lakselv lufthavn.
– Fredag peikar seg ut til å bli ein svært varm dag. Særleg på Nordvestlandet. Der ventar vi fleire dagar med over 20 grader. Einskilde stader på Vestlandet eller i Trøndelag kan få oppi 25 grader, fortel Fagerlid.
