Det er venta austleg sterk storm frå fredag kveld på Spitsbergen. Natt til laurdag kan hende også periodar med orkan i fjellet, altså middelvind over 32,7 meter i sekundet.
Det er også venta sterke vindkast med lokalt 40–45 meter i sekundet, fortel statsmeteorolog Jon Austrheim ved vêrvarslinga i Tromsø.
Nedbør som ligg i området kan gi mykje snøfokk når vinden står på.
– Temperaturen er venta å halde seg på eit par minusgrader, så det vil vere tørr snø som fyk, fortel meteorologen.
Spitsbergen er den største øya på Svalbard, og det er der alle menneskene som bur på øygruppa er busett.
18 år sidan førre ekstremvarsel for vind
Sist det vart sendt ut ekstremvarsel for Spitsbergen var for stormane «Hauk» og «Leif» i 1997, når systemet med ekstremvarsel var ganske ferskt.
På målestasjonen på flyplassen på Svalbard har dei aldri målt vind i orkan styrke.
– Kun ein gong før har det vore målt så sterk vind som vi ventar no. Det var i november 1985, og då vart det målt 41,2 meter i sekundet i vindkasta, fortel Austrheim.
– Det er ikkje der vinden blir aller sterkast, men det er ein ganske utsett plass.
Torsdag er det sendt ut fase A-varsel. Det er ikkje ekstremvêr, men betyr at meteorologane trappar opp overvakinga. Etter kvart som vêret nærmar seg vil dei vurdere om vinden vil blir så sterk at den kvalifiserer til fase B, og bli eit ekstremvêr som får namn.
Dersom det blir rolegare enn venta, blir varselet avslutta.
To lågtrykk slår seg saman
Den sterke vinden blir skapt av kraftige lågtrykk som kjem opp frå sørvest. Eitt lågtrykk ligg ved Jan Mayen, og eit anna ved Island. Dei to går nordover og slår seg saman, og blir liggande rett sør for Svalbard.
– Det blir veldig lågt trykk i senteret. Vi er framleis litt usikre på nøyaktig kor mykje vind det blir – men det blir mykje! konkluderer meteorologen.
For dei som er i det råka området anbefalar meteorologane å følge med på nyheiter på Tv, nett og radio utover dagen og i morgon. Meteorologane på Twitter kjem også med oppdateringar.
