Sist veke vart to skypumper observert på ulike stader i Noreg. Det ustabile vêret gjer at tilhøva ligg til rette for at fleire kan dukke opp, fortel meteorologen.
Oppstår ofte over havet
Det er ikkje tilfeldig at du oftare kan sjå det rare snabelforma fenomenet om sommaren enn om vinteren.
Ustabil luft i atmosfæren er nemleg ein føresetnad for skapinga av fenomenet, fortel statsmeteorolog Ida Mari Solbrekke.
– Det er ikkje eit veldig vanleg fenomen i Noreg, fortel meteorologen.
Men det er heller ikkje heilt uvanleg, for tilhøva ligg til rette for skypumper når den norske sommaren oppfører seg som den gjer. Det er fleire faktorar som skal klaffe før ei skypumpe dannast.
Ofte blir dei danna over vatn når sola varmar opp havoverflata, medan det er kjøligare i høgda. Ein kan sjå dei i samband med opptårna cumulusskyer.
Det blir danna eit undertrykk mellom den varme havoverflata og den kjøligare skya, slik at det blir ei oppsugande effekt frå skya, fortel Solbrekke.
– Skypumpa blir ikkje nødvendigvis danna i skya, men den koplar seg gjerne på på grunn av den oppsugande effekten, forklarer statsmeteorologen.
Nordavind gir optimale tilhøve
Den siste tida har det også vore ein del vind frå nord til sør. Det kan gi ekstra gode tilhøve for framvekst av skypumper.
Meteorologen forklarer at vinden går saktare over land enn over havet, på grunn av friksjonen den møter på.
Når det bles langs med kysten blir det ein ulikskap i kor fort vinden går over havet og over land, det som blir kalla eit horisontalt vindskjær.
– Då blir det danna små virvelvindar som ei skypumpe kan spinne vidare på, forklarer Solbrekke.
Så dersom det er ustabilt vêr og du oppheld deg ved kysten, har du ekstra god sjanse til å oppleve dette fenomenet.
Og om du ser ei skypumpe blir vi glade om du deler med Yr på Facebook, eller legg på Instagram med emneknaggen #yrno.
Meir om skypumper: