Det er ikkje lett å oppsummere juli-vêret i ei setning. Uforutseielege regnbyer og torevêr har gitt meteorologane hovudbry, men det har også vore mange fine dagar.
Men slik prognosane antyda i starten av månaden, vart juli litt kaldare enn normalen.
Juli var sist så kald i 1996
Med dei kaldaste badetemperaturane på 18 år og nattefrost i Hordaland, står ikkje juli igjen som eit prakteksemplar av ein sommarmånad.
Likevel var det ein ganske normal, norsk juli vi fekk servert.
Månadstemperaturen i landet låg 0,7 grader under normalen. Altså var ikkje avvika så store som i juni, som var uvanleg kald for alle.
Men det er viktig å hugse på at normalen som er nytta (sjå faktaboks) også er kald, og då blir ikkje avviket så veldig stort på papiret.
Om du samanliknar med sommarane vi har i ferskast i minne, opplevdes nok årets juli kjølig. Og vi må faktisk eit stykke tilbake for å finne ein kaldare juli-månad i Noreg.
– På landsbasis må vi tilbake til 1996 for å finne ein kjøligare juli, fortel klimaforskar Jostein Mamen.
Kaldast i Finnmark, våtast i Østfold og Telemark
I Aust-Finnmark var det over 3 grader kaldare enn normalen i snitt, og du må sjå heilt tilbake til 1989 for å finne ein juli like kald som i år.
På den positive sida var det også 25 prosent mindre nedbør enn vanleg mange stader i Finnmark.
Dei siste vekene har bydd på fleire OBS-varsel på grunn av mykje nedbør Austafjells, og kanskje har det gjort sitt til at Telemark og Østfold toppar nedbørsstatestikken.
Der har enkelte stasjonar målt 2-3 gonger meir nedbør enn det som er normalt i juli.
Også fine dagar
Sommaren har nok vore meir normal enn vi likar å tru. Sjølv om vi ikkje fekk tropenetter eller varmerekordar, har mange fått fine dagar innimellom.
Den høgste temperaturen vart målt i Meråker, der gradestokken synte heile 31,4 grader 2.juli.
– Grunnen til at mange er misnøgde i år, er nok av vi hadde ein slik fantastisk varm juli i fjor. Samanlikna med den har årets juli vore svært kjøleg, konkluderer Jostein Mamen.
Dette har også meteorologane på Twitter notert seg.
Dei kunne melde at Bergen i år har hatt 9 dagar med over 20 grader i juli i år, samanlikna med 23 dagar i fjor. I Oslo kunne dei notere 5 dagar med over 25 grader, medan dei i juli i fjor fekk 20.
Heile sommaren har ustabil, kald luft prega vêret her til lands. Enn så lenge syner ikkje prognosane nokon pangslutt på sommaren med høgtrykk og varme i august, men det kan framleis endre seg.
August kan også, som juli, glimte til med fine sommardagar.