Snødryss i alle landsdelar

Tysdag viste satellittbileta at det var blå himmel over heile Noreg. Både natt til tysdag og natt til onsdag var det nattefrost i så godt som heile Sør-Noreg.

– Det var faktisk nokre augneblinkar der det knapt var ein krok av landet der ein kunne skimta skyer. Det er sjeldan, seier statsmeteorolog Jon Smits ved Meteorologisk institutt.

Men no er det slutt. Onsdag kjem vêromslaget. Blå himmel vil verta erstatta med skyer, og i løpet av dagen vil det verta nedbør i store delar av landet.

– Det kjem eit nedbørsområde inn over Vestlandet. Dette vil seinare trekkja seg austover til Sørlandet og til Austlandet mot kvelden, seier statsmeteorologen.

I indre delar av Vest-Agder kan det vera snakk om 10 centimeter snø. I Hordaland opp mot 15 centimeter i Voss og på Kvamskogen.

– I Oslo er det nok snakk om «pyntemengder». Opp mot 4 centimeter. Men kanskje litt meir i Nordmarka, seier Smits.

Snøbyer frå sør til nord:

I løpet av onsdagen er det venta snø i alle landsdelar, ifølgje tekstvarselet til meteorologane.

Men det er på Vest-, Aust- og Sørlandet det vil komma større nedbørsmengder:

• Telemark: Det vil skya til, etter kvart snø.
• Agder: Snø, først i vest, etter kvart overgang til sludd. Til kvelden fare for underkjølt regn ved kysten.
• Fjellet i Sør-Norge: Frå i onsdag ettermiddag: Det vil skya til og etter kvart litt snø, først i sør.
• Rogaland: Frå i føremiddag litt sludd eller snø, etter kvart regn i ytre lågareliggande strok.
• Hordaland og Sogn og Fjordane: Frå i ettermiddag snø, etter kvart regn i ytre lågareliggande strok.
• Møre og Romsdal: I ettermiddag Det vil skya til frå vest og i kveld kan hende litt sludd eller snø på Sunnmøre.
• Trøndelag: Litt spreidd snø nordaust i Nord-Trøndelag.
• Nordland: I indre strok kan det verta litt snø utover dagen.
• Troms og Finnmark: I kveld Det vil skya til og litt snø i indre strok.
• Spitsbergen: Periodar med snø, lite nedbør lengst nord.

– Lenger nord er det eit lett snøvêr rundt svenskegrensa som vil kunna snika seg inn i indre strok av Noreg. Det er noko heilt anna som kjem inn over Sør-Noreg, seier Smits.

I starten vil nedbøren komma som snø over alt, men Smits reknar med at snøgrensa kan krypa opp til om lag 150 meter i løpet av dagen. Både på kysten på Sørlandet og på Austlandet kan det verta litt vått lengst ute på kysten.

Mildare torsdag

Også torsdag er det venta skyer og nedbør, og då særleg på vestlandet

– Vinden kjem til å dreia mot sørvest på torsdag. Det betyr meir regn og regnbyer. Snø over om lag 500 meter.

Dermed er ein periode med kalde temperaturar i heile Sør-Noreg over for denne gong.

– Me er ikkje så vande med vintervêr lenger. Når det legg seg eit høgtrykk over sentrale Skandinavia vert det låge temperaturar.

Kaldast natt til onsdag var det på Filefjell med -30,9.

– Det er faktisk det kaldaste som er målt der denne vinteren, seier meteorologen.