Snart snur vêret i Sør-Noreg

Til helga er det Nord-Noreg som får nyte sommarvêr. Store delar av Sør-Noreg må bu seg på skyer og regnbyer, men greie temperaturar.

Solnedgang i Lofoten

SOL I NORD: I helga skin sola over Nord-Noreg. Bildet er teke i Lofoten for nokre dagar sidan.

Foto: @fotonilsenlie / Instagram

– Er du sørpå, så pass på å nyte godvêret utandørs i dag! Fredag vil skyene dekke for sola i store delar av Sør-Noreg, fortel statsmeteorolog Matilda Hallerstig.

Ønskjer du å sikre deg sol denne helga må du vende nasen nordover.

Grått og kanskje vått

Vêret har vist seg frå si gode side i størsteparten av Sør-Noreg denne veka. Sola har tørka opp dammane i gatene, og mellom anna gitt mykje fortent varme til vestlendingane. Også på Sørlandet og Austlandet har folk fått nyte fleire finvêrsdagar. Til helga ser vêret ut til å snu.

– Sør-Noreg må nok vente seg gråvêr og periodar med regn i helga. Vi ventar på at skyene snart skal dekke til på Sørlandet og Austlandet, og deretter Vestlandet, seier meteorologen.

Dei nedslåtte paraplyane har kanskje ikkje rokke å tørke før vestlendingane må slå dei opp att. Trass i at det kan kome gløtt av sol innimellom, er det mogleg det vert regn fleire stadar, men på ulike tidspunkt.

Hallerstig fortel at prognosane er unormalt usikre i Sør-Noreg fortida, så det er veldig vanskeleg å seie kor regnet treff.

– Men regn vert det, poengterer ho.

– Skyene som først treff Sørlandet og Austlandet torsdag, og vil vare resten av helga. Det vert grått, og har du uflaks vert det vått, seier Hallerstig.

Heldigvis vil gradestokken halde seg rundt 20 grader mange område på Vestlandet. Det same gjeld Sørlandet og Austlandet.

Solskin i nord

Det aller beste vêret finn du i Trøndelag og Nordland til helga. Laurdag vert best i Trøndelag, søndag vert best i Nordland.

Laster Twitter-innhold

– Trondheim kan det bli opptil 23 grader på laurdag, seier Matilda Hallerstig.

Søndag vil det skye til i Trøndelag, og temperaturen vil søkke til rundt 18-19 grader. Det vert også fare for regn. I Nordland vil temperaturen halde seg litt under 20-talet.

– Nordland vert finast søndag, med unntak av nokre høge, tynne skyer. Men eg trur nordlendinger vil oppleve søndagsvêret som ganske fint, oppmuntrar meteorologen.

Troms og Finnmark vert også fint, men det er fare for tåkeskyer på kysten som kan øydelegge moroa. Sommarvêret kjem litt forseinka til Aust- Finnmark, som må vente på finevêret til søndag. Måndag kan det bli endå betre der.