Slutt på det eventyrlege sommarvêret

Bak oss ligg ei draumeveke, og biletesida til Yr flaumer over av herlege sommarbileter. Men denne veka blir det – dessverre – slutt på herligheita.

Høgtrykket må gi tapt

Vi har eit vêrskifte i vente. Høgtrykket som har gitt sol og varme i landet dei siste vekene, må gi tapt for lågtrykka som kjem frå sørvest.

Lågtrykket rullar seg over landet frå sør til nord, og startar allereie måndag kveld. Kort fortalt treff det slik:

Startar i sør på måndag
Tysdag går det nordover Austlandet med full kraft...
...før det kjem over fjella til Vestlandet i eit mildare format
Treff Møre og Trøndelag seint onsdag
Nordland torsdag...
...og til slutt kjem det til Troms og Finnmark mot helga

Eit lågtrykk bringer meir ustabilt vêr. Altså vil solskinet vi har blitt vande med, bli bytta ut med periodar med regn og lågare temperaturar. På nedbørskartet kan du følge med på lågtrykket si forventa bane, og på vêrradaren ser du kvar det regnar akkurat no.

Solid paraply-vêr i aust og sør

Hold på sydvesten i Sør- og Austlandsfylka. Der blir solvêrsdagane bytta ut med OBS-varsel for store mengder nedbør tysdag.

– Lufta som kjem er svært fuktig og ustabil, fortel vakthavande meteorolog Børje Johansson ved Meteorologisk institutt.

– Det er også fare for torevêr tysdag. Då kan det vere lurast å halde seg inne.

Det meste av regnet dett ned aust for Langfjella, men ein slepp ikkje unna i resten av Sør-Noreg heller.

– Måndag blir den siste dagen med fint vêr for Vestlandet sin del, medan Trøndelag kan få fint heilt til onsdag, fortel statsmeteorolog Kjersti Opstad Strand.

Strand fortel at vêrtypen blir meir lik det vi har hatt før i sommar. Altså kan det bli periodar med regn, men også sjansar for sol no og då.