Slik var vêret i juni

Den første sommarmånade har vore svært variert. Vestlandet gjekk av med to rekordar i juni.

Sol og regn

VÅTT TIL VARMT: Vestlandet gjekk av med sigeren for mest regn og for høgaste målte maksimumstemperatur på ein og same månad.

Foto: Vegard Wivestad Grøtt / NTB scanpix / Colourbox.com

Juni likna lite på sommar før siste innspurt av månaden venda om på det heile og gav landet etterlengta sol, varme og bikinitilstandar. Kanskje dei siste solfylte junidagane viska vekk minna om låge temperaturar, vind og sidelengs regn som prega mykje av landet resten av månaden?

– Juni har vore veldig varierande. Mange plassar har vore våte, medan andre stadar har vore veldig tørre. Temperaturar har vore høgt og lågt og det har vore stor variasjon rundt om i landet, fortel Reidun Gangstø Skaland, klimaforskar ved Meteorologisk institutt.

Lufttemperatur juni 2017

KALDT OG VARMT: Gult og oransje viser temperaturar over normalen. Grønt og blått under normalen.

Foto: Yr.no

Heilomvending på Vestlandet

Bergen kunne i juni skilte med ny regnrekord med 26 nedbørsdagar på rad. Oversikta over regnet i juni viser at det på Vestlandet regna over dobbelt så mykje som normalt. I Noreg målte desse stasjonane aller mest nedbør i løpet av juni:

  • Gullfjellet (Hordaland) 392,1 millimeter
  • Hundseid i Vikedal (Rogaland) 331,3 millimeter
  • Sand i Ryfylke II (Rogaland) 324,4 millimeter.

Regndagane varte heldigvis ikkje månaden ut, og vestlendingane fekk omsider tørka opp.

Vestlandet tørka ikkje berre opp – men gjekk til og med av med sigeren for høgaste målte maksimumstemperatur! På Voss i Hordaland vart det målt 27,8 grader fredag 30. juni.

Regnrekordar

Det var ikkje berre på Vestlandet det var vått. Fleire stasjonar i Trøndelag og i Telemark fekk ny junirekord for høg døgnnedbør og høg månadsnedbør.

Laster Twitter-innhold

Av alle stasjonane var det stasjonen på Postmyr i Dragendal i Telemark som hadde høgaste døgnnedbør med 85,2 millimeter 8. juni.

På den andre sida av skalaen var det Svalbard som var tørrast i juni. Meteorologisk institutt melder at det på Hopen målestasjon på Svalbard berre kom 1,6 millimeter regn i løpet av månaden; den tørraste regnrekorden sidan 1953. Svalbard lufthamn har heller ikkje hatt ein månad med temperatur under normalen på 79 månadar.

– Dette er signal som viser at den globale oppvarminga er spesielt sterk i Arktis, seier Gangstø Skaland.

Les også: Dramatisk smelting av permafrosten på Svalbard

Utanom Svalbard var det Nord Norge som fekk det tørraste vêret. Stasjonane med minst regn i løpet av månaden var desse:

  • Lyngen – Ura (Troms) 7,3 millimeter
  • Skibotn II (Troms) 10,1 millimeter
  • Skjomen Stiberg (Nordland) 10,6 millimeter.

Varmast i landet

Til trass for at Vestlandet målte høgaste maksimumstemperatur, var det i gjennomsnitt varmast på Austlandet, med hovudstaden på topp.

  • Tønsberg – Kilen (Tønsberg, Vestfold) med 15,9 °C
  • Oslo – Bygdøy (Oslo) og Drammen – Berskog (Drammen, Buskerud) med 15,7 °C.