Slik blir vêrhelga hos deg

Denne helga startar haustferien for mange. For desse har meteorologen gode nyheiter, medan helga kan bli litt våtare for andre.

Her blir det vått:

Nord-Noreg har mest uflaks denne helga. Eit lågtrykk går litt i stå over Nordland, og kjem med våte nyheiter.

– I dag er det flott i Nordland! Men i morgon kjem det regn inn frå sør, fortel statsmeteorolog Sivim Muller ved vêrvarslinga i Tromsø.

Enn så lenge verkar det som at Salten får mest av regnet. Akkurat kor mykje er vanskeleg å seie, fortel meteorologen. Antakelegvis rundt 30–50 mm, men det kan også komme berre 20 mm.

– Det er nok greitt å vere budd på at det blir vått! Spørsmålet er berre kor mykje som kjem, fortel Muller.

Også Troms og Finnmark får vått vêr i helga. I Troms blir helga prega av regnbyer, men Finnmark slepp billigare unna.

– Finnmark får minst regn, og der kan det godt bli opphaldsvêr og ein og annan sprekk i skydekket, melder meteorologen.

Her blir det snø på toppane:

Nokre ivrige sjeler har allereie teke fram skia og trippar i lengsel etter snøen. Meteorologen ved vêrvarslinga i Bergen kan melde at ja, det blir litt kvitt. Men berre på dei aller høgste toppane.

– Det skal nok godt gjerast at det blir skiføre, og det blir heller ikkje så dramatisk med tanke på fjellovergangane, meiner statsmeteorolog Trond Thorsteinsson.

Natt til laurdag blir det kaldast. Då kan snøen snike seg ned til 1200 meter, og dersom du har utsyn mot fjella vil du sjå at det er kvitt på toppane.

I låglandet på Vestlandet og i Trøndelag startar helga våt og grå, med regn og fare for torebyer. Laurdag kveld skjer eit skifte.

– Det kan bli ein fin søndag går det mot opphald sør for Stad, og etter kvart går det lengre nord. I Trøndelag vil regnbyene henge litt igjen, fortel meteorologen.

Her blir det sol:

Fredagen kan bli ustabil med regnbyer og torevêr Austafjells, men laurdag kjem «nordvesten».

– Eg trur det blir mykje sol! Mange startar på haustferie til helga, så vi er heldige her, seier statsmeteorolog Siri Wiberg Horjen.

Når vêret kjem frå nordvest, ligg Aust- og Sørlandet i skuggen bak Langfjella. Det kan likevel bli litt skyer i fjellområda lengst vest og nord.

Det som kan spenne bein for solstrålane, er den typiske haust-tåka:

– No om hausten er sola oppe kortare, og det tek lengre tid før sola klarar å bryte ned morgontåka. Då kan den henge igjen dagen igjennom, fortel meteorologen.