I år fell fyrste mai på ein torsdag og for mange betyr det sjansen til å ta ei skikkeleg langhelg. Uansett om du har tre eller fire dagar med fri framfor deg, vil du ikkje få det verste vêret. Sjølv om det blir kaldare, kik sola innom både i sør og nord.
Helga opnar med 1. mai, ein fridag for mange arbeidarar og skuleelevar.
– I Sør-Noreg blir dette ein flott dag å ha fri på, seier meteorolog Rafael Escobar Løvdahl ved Meteorologisk institutt.
– Det blir ein fin dag å gå i tog og vere ute. Dei einaste som kan trenge ein paraply er dei som bur lengst nord på Austlandet, for på ettermiddagen kan det komme lokale byer her.
Resten av helga held vêret seg stort sett uendra og fint sør i landet, med nokre lokale byer nord for Lillehammer. Men sjølv om sola skin, vil ikkje temperaturane bli så høge.
– I sør kjem temperaturane neppe over ti grader på dagtid. Har du stelt mykje i hagen og er blitt spesielt glad i blomstrane dine, kan det vere lurt å dekke dei til om natta. Det kjem truleg nattefrost i indre strøk, seier Escobar Løvdahl.
BRUKT MYKJE TID I HAGEN SISTE VEKA?: Då kan det vere lurt å dekke til blomane om natta. Meteorologane varslar nattefrost fyrste mai-helga.
Foto: SAMI BELLOUMI / PHOTOPQR/VOIX DU NORDSol og byer på Vestlandet og i Trøndelag
Vestlandet får også mykje bra vêr den fyrste helga i mai.
– Sør for Stad blir 1. mai ein stort sett fin dag, med unntak av nokre lokale byer, fortel meteorolog Arnstein Tjøstheim ved Vervarslinga på Vestlandet.
Det same gjeld den nordlege delen av Vestlandet, og sidan det blir kjøligare betyr det sludd og snøbyer.
Sola lurer seg fram mellom byene, men det blir likevel ganske kjølig og fare for nattefrost både torsdag og fredag. Mot slutten av helga stig temperaturane noko og mange av byene forsvinn frå denne delen av landet.
LES OGSÅ:
VARSLAR SLUDDBYER: I Nord–Noreg vil vêret skifte mellom sol og byer denne helga.
Foto: PHILIPPE Pauchet. / PHOTOPQR/LA VOIX DU NORDSkiftande i Nord–Noreg
Indre strøk av Nord–Noreg får bra vêr i langhelga. Men noko meir ustabilt blir det langs kysten. Her vil vêret skifte mellom sol og byer.
– I nord vil vêret variere ganske mykje. Deler av landsdelen får sludd og snøbyer, men det kjem litt an på korleis vinden bles, fortel meteorolog Rafael Kuhnil ved Vervarslinga for Nord–Noreg.
Litt kjøligare vil det også bli i nord.
– Ein treng ikkje dunjakke og goretex lenger, men det er framleis kaldt. Kle dykk varmt og ta med solbriller, lyd oppfordringa frå meteorologen.
