Slik blir UV-strålinga i påska

Austlandet og Finnmarksvidda kan få smake sola allereie i palmehelga. I resten av landet er folk klare til å strøyme ut i fjellheimen ved første solstråle.

I ein fersk pressemelding åtvarar Kreftforeningen mot farane ved å utsette seg for sterk UV-stråling.

Difor er påska farlegare

I påska er det ekstra stor fare for å bli solbrent. Mange går på ski i ope landskap ihøgfjellet.

– Då er det ekstra viktig å hugse på solkrem, for refleksjon frå snøen kan auke UV-nivået med opp til 50 prosent, fortel Lill Tove Nilsen frå Statens strålevern.

Det er ikkje berre i fjellet sola kan bli farleg. Skal du sjøsette båten i ferien, må du hugse at også sjøsprøyt og bølger reflekterer solstrålane.

Også tjukkleiken på ozonlaget påverkar UV-indeksen. Om våren varierer ozonlaget ekstra mykje, og det kan bli store forskjellar på kor sterk strålinga er frå dag til dag.

UV-indeksen seier noko om intensiteten i solstrålane. Om UV-indeksen er tre eller høgare, treng du solbeskyttelse. Men skal du på langtur og vere i sola lenge, bør du beskytte deg allereie på UV-indeks to.

I fjellet i Sør-Noreg kan det blir UV-indeks på tre-fire denne påska. Dersom vi får dagar med lite ozon kan UV-indeksen bli opp mot fem.

– UV-indeks fem er like sterk solstråling som på Sørlandet i byrjinga av juni, seier Lill Tove Nilsen.

Strålinga er spesielt sterk midt på dagen når sola står midt på himmelen.

Nordmenn er solkrem-verstingar

Påska er ei ynda tid for å lufte vinterbleike kroppar, og mykje hud går frå kritkvit til lyserosa.

– Mange får litt for mykje av vårsola, seier generalsekretær i Kreftforeningen, Anne Lise Ryel.

Noreg er blant landa i verda som har høgst førekomst av føflekkreft. Denne kreftforma har auka mest dei siste åra. Huda gløymer ikkje solskadar, dei blir samla opp og kan på sikt føre til hudkreft, fortel Ryel.

Hugs å følgje med på UV-varselet for ditt område på Yr.no i tillegg til vêrmeldinga denne påska.