Sjekk når hausten kjem til deg

For nokon er startskotet for hjortejakta det sikraste teiknet på at hausten er her. For andre kan det vere dagen ein ser at blada er i ferd med å skifte farge, eller morgonen ein må trekke fram ullgenseren frå skapet.

Andre omstiller seg til ei ny årstid ved inngangen av den fyrste haustmånaden. Men skal ein følgje meteorologane sin definisjon, er det ikkje sikkert det er haust, sjølv om kalenderen syner september.

– Det er jo ulike måtar å sjå dette på. Men me seier at når den normale døgnmiddeltemperaturen synker frå ti til null grader, då er det haust, seier klimaforskar Jostein Mamen ved Meteorologisk institutt.

Ligg gjennomsnittstemperaturen hos deg framleis over 10 grader? Ja, då kan du faktisk ut frå denne definisjonen med rette hevde at sommaren ikkje er over.

Sjekk når hausten kjem til deg nedst i saka

Kvar kjem hausten sist?

Når kjenneteiknet på haust er ein døgnmiddeltemperatur på mellom 0 og 10 grader, betyr det at skilnadane er store på når hausten kjem til ulike deler av landet.

– I fjellet blir det fyrst haust, medan den kan komme langt seinare på kysten av Vestlandet. Seinast kjem den vanlegvis til Lindesnes fyr, der den normalt startar 15. oktober, fortel Mamen.

I nokre deler av landet vil ein ha haust heilt til våren kjem, ifølgje klimaforskaren.

– I deler av Rogaland, Hordaland og Sogn og Fjordane har ein ikkje vinter. Det er også stader som kysten av Aust-Finnmark som strengt tatt ikkje har sommar, fordi døgnmiddeltemperaturen aldri går over 10 grader. Der kan hausten byrje alt 3. august.

Når kjem hausten til deg?

Under kan du sjå når hausten normalt kjem til ulike deler av landet. Finn du ikkje heimstaden din i tabellen? Sjå korleis du kan sjekke dette nedst i saka.

STAD	FYLKE	HAUSTEN STARTAR
Alta	Finnmark	31. august
Bardufoss	Troms	27. august
Bergen	Hordaland	2. oktober
Bodø	Nordland	8. september
Drammen	Buskerud	20. september
Fredrikstad	Østfold	6. oktober
Førde	Sogn og Fjordane	11. september
Hammerfest	Finnmark	22. august
Harstad	Troms	3. september
Haugesund	Rogaland	5. oktober
Karasjok	Finnmark	22. august
Kristiansand	Vest-Agder	30. september
Lillehammer	Oppland	7. september
Lillestrøm	Akershus	12. septmeber
Mo i Rana	Nordland	1. september
Molde	Møre og Romsdal	15. september
Narvik	Nordland	4. september
Oslo	Oslo	21. september
Sandefjord	Vestfold	24. september
Sandnes	Rogaland	7. oktober
Sarpsborg	Østfold	27. september
Skien	Telemark	24. september
Stavanger	Rogaland	6. oktober
Steinkjer	Nord-Trøndelag	12. september
Tromsø	Troms	25. august
Trondheim	Sør-Trøndelag	8. september
Tønsberg	Vestfold	24. september
Vadsø	Finnmark	8. august
Volda	Møre og Romsdal	15. september
Gjennomsnittleg dato for når hausten kjem er basert på normalperioden 1961-90. Tabellen kan ikkje brukes som eit rent vêrvarsel, men antydar når hausten normalt sett kjem ut i frå ein meteorologisk definisjon. *Manglar staden du bur på i tabellen? Søk på ein stad på yr.no.

Fann du ikkje staden du bur?

Slik kan du sjekke når hausten vanlegvis kjem til deg:

Søk på heimplassen din på yr.no.
Trykk på «været som var» og «detaljert»
Under «temperaturar» finn du normaltemperaturane. Den fyrste datoen etter sommaren der temperaturen er under 10 grader vert rekna som årets fyrste haustdag.