Siste innspurt for finvêret

Laurdag kan bli bra for dei aller fleste i sør, medan i nord kryssar dei fingrane for søndag.

Kjenne på sola

Det er lov å hoppe av glede når sola kikar varmar.

Foto: @kikkiveben / Instagram

Det som kan vere sommarens varmaste veke går mot slutten. I helga skin sola skikkeleg frå seg, for søndag er det slutt på høgtrykket som har holdt regnet vekke.

– Då må trøya på om kvelden igjen, for den norske sommaren er tilbake, fortel langtidsvakta ved Meteorologisk institutt.

Helga kan starte med torevêr og brak

Austafjells har dei surfa på ei herleg sommarbølge i det siste, og meteorologane kan fortelje at det ser ut til å fortsette ut laurdag.

Fredag startar helga med lokale tore- og regnbyer, på grunn av ustabil luft som kjem inn over landet. Det blir ikkje mykje, men nok til at temperaturane beveger seg vekk frå 30-talet der dei har vore oppe dei siste dagane.

– Men det blir ikkje mykje nedbør, og allereie laurdag blir det tørt og stabilt igjen, forsikrar meteorolog Espen Biseth Granan.

Biseth Granan kan også melde at badetemperaturane på Austlandet endeleg har begynt å krype oppover. I Vestfold ligg dei på rundt 17–18 grader, og kanskje blir det varmare i helga?

Surnadal i solskin

Surnadal på Nord-Møre er ein av stadane som kan tippe over 30 grader før regnbyene skyl inn. Kanskje blir det også tropenatt?

Foto: @mavattoy / Instagram

Laurdag kan bli betre!

Natt til fredag kan bli årets første tropenatt, om ikkje nedbøren kjem for tidleg. For fredag skal regnbyer dominere både på Vestlandet, Trøndelag og Nord-Møre. Men ikkje fortvil – laurdag lovar betre.

– Laurdag blir best for dei fleste, konstaterer Anne Mette Olsen ved vêrvarslinga i Bergen.

Skyene som kjem inn fredag lettar tidleg laurdags føremiddag sør for Stad, men om kvelden kjem byene igjen og senkar temperaturen. Nord for Stad kjem ikkje sola før laurdag ettermiddag, men til gjengjeld kjem regnet litt seinare.

– I Trøndelag dryger regnet kanskje heilt til søndag ettermiddag, så om dei er heldige får dei eit heilt solskinsdøgn, fortel meteorologen.

Håp for solgløtt i nord

– Vi kryssar fingrane og håpar framleis på betre vêr, seier meteorolog Hanne Sigrun Dyhring i Tromsø.

Les også: Issalet stuper i nord

Fredagen blir våt både i Nordland og Troms. I Finnmark startar helga rimeleg bra, men nokre byer forviller seg kanskje inn over vidda.

Laurdag fortset i same stil, med regnbyer i alle dei tre nordlegaste fylka. Søndag er dagen å satse på i nord:

– Nordland ser det bra ut søndag. Også både i Finnmark og Troms er det gode sjansar for å sjå sola mellom byene, fortel hanne Sigrun Dyhring.