Etter planen skal sesongopninga i langrenn gå av stabelen på Beitostølen 13.-15. november. No fryktar arrangørane at sesongopninga må avlysast på grunn av dei dårlege snøtilhøva.
Skiløypene der det skal konkurrerast om edle metall neste helg er dekka av snø som fall i fjor. Den kjempar tappert i mot det varme vêret, men det kan sjå stygt ut, sa arrangør Erik Østlie til NRK tysdag.
Det er i så fall ikkje første gong vêret spenner bein for Beitosprinten.
Avlyst to gonger på 10 år
Både i 2005 og 2011 vart Beitosprinten avlyst på grunn av mildvêr og snømangel.
I 2011 var det verken snø eller tele i bakken når rennet skulle gå 11.–13. november. Faktisk var heile vinteren 2011–2012 var prega av mildt og vått vêr, i motsetning til dei to føregåande åra som var beinkalde.
Snø-statistikken for dei siste 10 åra syner at arrangørane har å gjere med eit ustabilt novembervêr når dei skal planlegge skirenn:
Fire sesongopningar har vore planlagt i helger der det har vore 0 cm natursnø på bakken. To gonger vart rennet avlyst, men i 2007 og 2013 gjekk renna trass i lite natursnø.
Andre gonger har det gått ein del lettare på Beitostølen, som i 2009. Då dumpa det ned ein halv meter snø fram til rennhelga i 2009.
– I tidlegaste laget å arrangere skirenn
November er ein lunefull månad, midt i skiftet mellom haust og vinter i Sør-Noreg.
Stein Kristiansen jobbar med klimainformasjon ved Meteorologisk institutt. Kristiansen kryssar fingrane for kuldegrader på Beitostølen, for han er interessert i både vêr og langrenn, og har tenkt å følge med på sesongopninga.
Foto: Bård GudimPå denne tida kan naturen fort sette bremsane på for skikalaset på Beitostølen, fortel Stein Kristiansen. Han jobbar med informasjon om klima og statistikk ved Meteorologisk institutt, og har god kontroll på når snøen brukar å falle.
– Av naturlege årsaker er nok november litt i tidlegaste laget, seier Kristiansen.
Han forklarer at dei siste 30 åra har vi sett at hausten blir lengre og våren startar tidlegare, altså blir vinteren kortare. Det merkast nok oppe på Beitostølen også.
Meteorologane sine målingar viser berre natursnøen. Det er ikkje den som skal redde sesongopninga på Beitostølen framtida, meiner Kristiansen.
– For å forlenge vinteren må dei nok produsere meir snø sjølv, konkluderer han.
Skal dei produsere meir snø på Beitostølen, må kuldegradene komme først. Kanskje er det eit lyspunkt i sikte, for temperaturen kan falle til under null i slutten av neste veke.
