Så lenge varar uvêret

Nei, det er ikkje heilt over enda. Regn, flaumfare og vasstand toppar seg i ettermiddag, men den kraftige vinden er ferdig, melder meteorologen.

Oversvømming i Indre Sædalen

FLAUMFARE: Mykje nedbør blir spesielt godt merka i vegbaner og i tettbygde strøk. – I Bergen hamnar vatnet fort i gatene og inn i hus, fortel meteorologen. Her frå Indre Sædalen i Hordaland.

Foto: Kirsten Øystese

Utanfor vindauga til meteorologane ved vêrvarslinga i Bergen ligg skyene lågt og regnet pøsar ned. Slik vil det halde fram ut fredag, melder Gunnar Livik ved vêrvarslinga på Vestlandet.

Dei kraftige vêrsystema som ligg utanfor norskekysten er ikkje ferdig med runda si før natt til laurdag. Det har allereie vist musklar frå Vestlandet til Nordland.

Flaumfare på nivå to

I Hordaland, Sogn og Fjordane og Møre og Romsdal er det høg vassføring grunna regnet som har komme i går kveld og natt. I morgonen av har regnet roa seg, men i ettermiddag skal det kome ein ny, kraftig runde.

Anne Fleig ved flaumvarslinga til NVE fortel at dei heldt oppe gult flaumfarenivå i dei tre fylka ut dagen.

– Vi har også ute varsel for jordskredfare, og det har komme nokre skred alt. Det er også fare for sørpeskred, fortel Fleig.

Den varme lufta gjer at det kan regne langt opp på fjellet. Dersom snøpakken ikkje klarar å drenere vekk vatnet som kjem, kan det bli utløyst sørpeskred.

Meteorolog Gunnar Livik fortel at dei ventar ein ny runde med kraftig regn i ettermiddag. Mot kvelden droppar temperaturen drastisk, og regnet kan gå over til snø heilt ned til 3–500 meter.

– Nedbøren er venta å gå over til sludd og snø, og det blir meir byevêr. Det er venta vanskelege køyreforhold, med typisk nullføre og sludd på fjellet, fortel Livik.

Haukelifjell E134

FJELLOVERGANG: På E134 over Haukelifjell er det regn på Vegvesenet sitt webkamera i føremiddag.

Foto: Vegvesen.no

Vinden er over, men vasstanden går mot topp

Det var ein kortvarig storm som herja i Nordland i natt. No har vinden roa seg til kuling, og det er berre vasstanden som kan utgjere eit problem.

– Vi fornyar OBS-varselet for høg vasstand i nord, fortel meteorolog Gunnar Noer frå vêrvarslinga i Tromsø.

I Finnmark er vasstanden venta å gå over kriteria for ekstremvêr. Men med rolege vindforhold er det ikkje like farleg, fortel meteorologen.

OBS-varselet for vasstand over det som er meldt i tidevasstabellen gjeld heile kysten ned til Kristiansund. Det er venta at det vil bli utvida til å gjelde kysten lenger sør utover dagen.