Det har vore nokre spesielle morgontimar Austafjells. Føret er såpeglatt, og politiet oppmodar folk til å late bilen stå.
Den gode nyheita er at temperaturen er på veg opp, og det vil gå frå is til vått på bakken i løpet av føremiddagen. Men det er store lokale variasjonar, åtvarar meteorologen
– Vi kan ikkje sjå bort frå at det vil vare ei stund til, for det er vleldig kald luft rett over bakken, åtvarar meteorologen.
- Dette er underkjølt regn.
Iskald bakke og varm luft
Hovudforklaringa på dei glatte tilhøva i morgontimane er at det har vore kjølig lenge, og bakken er veldig kald. I dag tidleg kom det inn ein varmfront med låge skyer og regn.
Når regnet treff den kalde bakken frys det, og dannar eit tynt islag på vegane.
– Det tek litt tid frå varmlufta som kjem inn klarar å smelte isen og varme opp bakken, forklarar statsmeteorolog Anita Ager-Wick.
Langs kysten er temperaturen alt på veg til å stige, og det vil lette køyreforholda. Også i Oslo-områda er temperaturen på veg opp. Lenger inn i landet er det kaldt, men ingen farleg nedbør.
I ytterkanten av nedbørsfelta er ikkje faren over. Der har ikkje varmlufta nådd til for å varme opp bakken, og regnet som kjem utover dagen kan framleis fryse til is.
– Det gjeld til dømes i områda mellom Drammen og Kongsberg, og aust og nordaust for Hamar, tipsar meteorologen.
Det er venta meir nedbør utover dagen, men då blir det varmare.
Då er det altså i grensene av nedbørsfelta de må vere påpasselege, og det kan vere lurt å følge med på vêrradaren for å sjå kvar nedbøren beveger seg.
Ny utfordring i morgon tidleg
I løpet av dagen vil det komme meir regn til kysten av Agder og Telemark, og i Oslo-området.
Då vil bakken i hovudsak vere våt, men meteorologen poengterer at det kan vere store lokale forskjellar.
– No er det minus to grader på Gardermoen, medan her på Blindern er det to plussgrader. Det er store forskjellar i små område, poengterer Ager-Wick.
I hovudsak vil nedbøren komme som regn i løpet av ettermiddagen. Det kan gi eit nytt problem i rushet i morgontidleg:
– Det er lite vind no, så fuktigheten som kjem på bakken vil ikkje fordampe. Da kan den fryse i natt igjen, slik at det er is i morgontidleg. Det er best å følge med no!
OBS! Ikke gjør som Atle Antonsen (se video under).