Plutseleg spratt temperaturen opp to-tre grader på målestasjonen på Blindern i dag. Dermed var rekorden i boks.
I dag – 26. september – er den 105. dagen i 2018 med meir enn 20 grader. Aldri før har målaren registrert 20 grader så mange dagar i løpet av samme år.
– Det er veldig hyggeleg! Vi hadde ei tangering førre veke, men så blei det kjøligare. Då blei vi i tvil, men siste del av september kan gje innslag av sommar, seier statsmeteorolog John Smits.
Rekorden som har stått sidan 1947 var 104 dagar med meir enn 20 grader.
– Vi som bur i Oslo har merka godt at vi har hatt mange varme dagar. Fram til ei veke ut i august kunne ein rekne med 20 grader uansett. Etter det har vi plukka einskilde dagar, seier Smits.
Rekorden kan bli utvida
Sjølv om den gamle rekorden er slått veit vi ikkje kva den nye rekorden endar på. Det er framleis 96 dagar igjen av året.
– Det får vi sjå. Det blir kaldare i morgon, og det blir heller ikkje varmt torsdag og fredag. Men på prognosane ser det ut til at det kan bli ganske mildt nokre stader på Austlandet delar av haustferien neste veke, seier Smits.
1969 blei det målt over 20 grader på Blindern så seint som 9. oktober.
Diskusjon om detaljane
I nokre vêrstatistikkar står Blindern-stasjonen oppført med 106 nordiske sommardagar i 1947. Det er på sett og vis riktig. Men på Meteorologisk institutt er dei samde om at 104 dagar er meir riktig.
Forklaringa er det som heiter eit «temperaturdøgn», som går frå kl. 20 til kl. 20 neste dag.
Klimaforskar Jostein Mamen ved Meteorologisk institutt.
Foto: met.no– På ein varm dag vil temperaturen kunna halde seg over 20 grader også etter klokka 20 om kvelden. Dersom det då blir kjøligare vêr det neste døgnet, slik at temperaturen ikkje kjem opp i 20 grader, vil temperaturen som er målt kvelden før bli ståande som den høgaste, forklarar klimaforskar Jostein Mamen, ved Meteorologisk institutt.
Akkurat dette skjedde to gongar i 1947. Mamen og kollegaene på instituttet meiner det nok vil bli oppfatta meir riktig å berre bruka temperaturen på dagtid.
