NRK har tilsett Håvard Skaug (34) som ny redaktør for yr.no. Skaug kjem frå stillinga som produktsjef for gulesider.no i Eniro.
– Det er to år sidan yr.no vart lansert, og no er det på tide å gå gjennom heile tenesta på nytt, for å vidareutvikle yr.no og gjere sidene endå betre og enklare å bruke, seier Erik Bolstad, avtroppande yr.no-redaktør. Vi er sikre på at Håvard er rett mann for å utvikle yr.no til ei endå betre teneste for alle nordmenn, held han fram.
Håvard Skaug kjem frå Tønsberg og har arbeidd med ulike nettenester i åtte år. Han har allereie mange planar for vidareutviklinga av yr.no.
– Eg håpar vi kan tilpasse yr.no slik at brukarane sjølv kan avgjere kva slags innhald dei ynskjer å få opp med ein gong dei kjem inn på tenesta, seier Håvard Skaug. Eg gler meg òg veldig til å lære meir om vêr, og til å vere med på å gjere yr.no til ein stad der alle nordmenn kan lære meir om vêr og meteorologi. yr.no skal vere staden som triggar til læring for både liten og stor!
Som friluftsmann ser Skaug for seg at yr.no utvider vêrvarsla med nye funksjonar for folk som likar å vere i fjellet, skogen og marka.
– Vi må tenkje på turfolk og andre friluftsinteresserte slik at tenesta blir endå betre for dei. Sjølv er eg blant dei som meiner at det korkje finst bra eller dårleg vêr, dette er avhengig av situasjonen til den enkelte. Det finst utallege situasjonar der folk må tilpasse seg vêret, og det er mellom anna dette som gjer utviklinga av yr.no så spanande.
Korleis var eigentleg vêret?
yr.no vart lansert i september 2007, og det fyrste året vart nytta til å vidareutvikle vêrvarsla for landområda. Tidleg i 2009 kom det ei eiga teneste med hav og kyst-varsel, som har blitt svært populær blant seilarar, fiskarar og andre båtfolk.
– Vi ynskjer å satse meir på å vise fram observasjonar og klimastatistikk framover. yr.no får svært mange gode innspel og idéar frå brukarane. Blant tenestene vi har fått mykje spørsmål om er ein funksjon for å sjå korleis vêret har vore på f.eks. 17. mai dei siste 100 åra, eller korleis temperaturen har endra seg i Bergen dei siste 200 åra. Dette gler vi oss veldig til at Håvard og dei andre som er involverte i yr.no skal arbeide med til hausten og på nyåret, seier avtroppande redaktør Erik Bolstad.
Søk og kart er nye satsingsområde
yr.no er ei teneste frå Meteorologisk institutt og NRK, der Meteorologisk institutt er ansvarlege for det meteorologiske innhaldet og datagrunnlaget; og NRK er ansvarlege for presentasjonen av varsla (design og brukargrensesnitt) i tillegg til nyheitstenesta. yr.no var den fyrste europeiske vêrtenesta med superdetaljerte varsel for eit stort tal stader, og er i dag ein av dei største nettstadene i Noreg.
– yr.no er ei god teneste i dag, men det er mange grep vi kan gjere for at ho skal bli endå betre. Ei av dei store utfordringane på yr.no er å forbetre søkjet, i tillegg til at eg har lyst til å vidareutvikle karttenestene og presentasjonen av meteorologiske data på kart, seier Håvard Skaug. Dette kan heilt klårt bli betre, men her har eg kanskje eit snev av yrkesskade etter å ha arbeidd mykje med kart og søk oppigjennom åra, smilar han.
Heilt nye og meir treffsikre varsel på trappane
Ein av dei største endringane som kjem på yr.no i 2009 eller tidleg i 2010, er heilt nye og meteorologkorrigerte varsel. I dag blir alle varsla på yr.no henta direkte frå meteorologiske modellar, i framtida skal ein meteorolog etterkorrigere varsla som kjem frå desse modellane slik at dei skal bli endå meir treffsikre. yr.no vil vere den fyrste vêrtenesta i verda med ein slik omfattande etterkorrigering for så mange stader.
Håvard Skaug tek til i jobben som redaktør 1. oktober. Fram til då er Anders Hofseth fungerande redaktør for yr.no. Tidlegare redaktør Erik Bolstad held fram som redaksjonssjef for tenesteutvikling i Nye medier-avdelinga i NRK.
Send ei helsing til den nye redaktøren!
Er det noko spesielt du meiner at Håvard bør tenkje på i den nye jobben? Er det tenester du saknar på yr.no i dag? Kom med dine gode tips og råd i kommentarfeltet nedanfor!