Med eit høgtrykk over Sør-Noreg og vestavind i fjellet har det i dag skjedd ei temperaturendring i store delar av landet.
– Når det bles relativt kraftig i fjella, slik som det gjer no med stiv til sterk kuling, får vi ein føneffekt, seier statsmeteorolog ved Meteorologisk institutt, Rafael Escobar Løvdahl.
Det betyr at lufta blir pressa ned på baksida av fjellet. Denne lufta høyrer eigentleg heime lenger oppe, men i dag har den blitt pressa ned.
– Når du får høgare trykk, får du stigande temperatur, seier Løvdahl.
Austlandet er temperaturvinnaren
Sidan det no er vestavind, er det austlandsområda som får dei høgaste temperaturane.
– Hadde det vore austavind i staden for hadde det vore varmare på Vestlandet.
Særleg tre område austpå har fått kjenne på vårvarmen i dag. Gjerpen i Telemark var det heile 13 grader klokka 11 onsdag føremiddag. Nøtterøy i Vestfold hadde 12,2 grader og i Tofte i Buskerud var det målt 12,1 grader.
I mellom anna Oslo og Buskerud har det også skjedd eit temperaturhopp, som betyr at temperaturen aukar kraftig på kort tid.
På Bygdøy i Oslo endra temperaturen seg frå -2,2 til 7,7 grader på berre ein time mellom klokka 8 og 9 onsdag morgon. På Blindern steig den frå 0 til 7 grader på ein time.
Årsaka til temperaturendringa har å gjere med at varm vind hadde problem med å dytte vekk den tunge, kalde lufta.
Når lufta ligg stille, blir varmlufta verande i høgda og får ikkje flytta på kaldlufta i botn. Om det då kjem eit vindkast, forsvinn den kalde lufta og blir erstatta med varm luft.
– Dette er eit vanleg fenomen om vinteren, men det blir ekstra påfallande i dag når det også er sol.
Framleis kaldt i nord
Frå Bodø og nordover blir det ikkje særleg med mildvêr med det første. Sidan det er eit høgtrykk frå Sentral-Europa, samlar lågtrykket seg i nord.
– Lågtrykket som kjem inn frå vest må ta seg ein runde rundt høgtrykket vi har no, og det har gått på land i Nordland, seier Løvdahl.
I Nordland er det fart på lågtrykket. Det fører til kraftig vind.
– Dei neste dagane kjem lågtrykka inn på rekke og rad inn mot Nord-Noreg. Sidan lågtrykka går så langt nord, kjem det til å vere mildvêr i Sør-Noreg ut veka.