Meteorologen: - Pessimistisk for helga, men det er håp for neste veke!

Fram med sydvesten, laurdag blir mange klissklass.

regn og paraply

GODT UTSTYRT: Du treng ikkje vatne blomane i helga om du bur på Vestlandet. Det tek eit kraftig lågtrykk som kjem inn frå vest seg av.

Foto: @vigdisanne/Instagram

Vi tek dei gode nyheitene først. Statsmeteorolog Geir Ottar Fagerlid fortel at det ser ut som ein høgtrykksrygg vil bygge seg opp neste veke.

Det kan bety finvêr til store delar av landet! Er det det strålande sommarvêret vi har venta på som kjem sigande?

– Det ser positivt ut, men vi kan ikkje love noko enda, poengterer Fagerlid.

Men først kjem helga. Og nokon vil bli skikkeleg, skikkeleg klissvåte.

Rotbløyte på Vestlandet

Geir Ottar Fagerlid

METEOROLOG: Ikkje kjempegode nyheiter frå Geir Ottar Fagerlid og kollegaene ved Meteorologisk institutt for denne helga.

Foto: Meteorologisk Institutt

Fredagen kan bli ein pustepause med både varme og sol i store delar av Sør-Noreg. Dei kraftige byene som har prega Austlandet dei siste dagane roar seg, og det kan bli gode periodar med sol.

– På Vestlandet bør alle uteaktivitetar bør gå føre seg på fredag, er meteorologen sitt tips.

For laurdag kjem eitt skikkeleg regnvêr.

– No må eg øydelegge helga for mange, for det ser ikkje særleg lovande ut. Eit lågtrykk skal sørge for mykje pålandsvind og 50-80 mm regn dei mest utsette plassane.

Det blir ein typisk vest-aust situasjon, der Austlandet blir liggande meir i le bak langfjella. Nokre regnbyer vil snike seg over til dei vestlege områda på Aust- og Sørlandet.

– Dei slepp ikkje heilt unna nedbøren på Austlandet heller, men det blir i langt mindre mengder, slår meteorologen fast.

Laster Twitter-innhold

Her blir det betre

Meteorologen fortel at kysten frå Lindesnes til svenskegransa kjem best ut av det denne helga.

– Her kan temperaturane vere rundt 20 grader. Dei får minst nedbør og har mest håp om sol, fortel Fagerlid.

Men også i Nord kan starten av helga bli fin.

Laurdag kan starte greitt i Nord-Noreg med opphald i store område og stigande temperaturar. Men frå laurdag ettermiddag og søndag ser litt verre ut for områda i Nord.

«Husk å nyte oppholdsværet før nedbøren kjem», skriv Meteorologane på Twitter.

Då kjem eit lågtrykk frå aust. Det har med regn til Troms og Finnmark. Det når ikkje heilt ned til Nordland, men dei får nok sin dose av det våte likevel.

Lofoten i solskin

LOFOTEN: På Yr-bilde har vi fått inn mange solskinsbilder frå nord denne veka. Spesiell frå Lofoten, der denne Yr-brukaren var på tur.

Foto: @fotografnordskog/Instagram

– Nordland hamnar litt i klem. Dei vil også få ein fin laurdag, men vil bli påverka av lågtrykket som kjem opp frå Vestlandet søndag.

Meteorologen har altså ikkje dei mest strålande vêrmeldingane på menyen i dag. Så lat oss krysse fingrane for neste veke, det er høgtrykkslys i tunnelen!