Meteorologane i kor: – Dette er fake

Bilde av ei Ole Brumm-sky har gått sigersgang på nettet den siste veka.

ole Brumm-sky

OLE BRUMM-SKY: For godt til å vere sant? Det meiner meteorologane. Men det er jo veldig gøy dersom det er ekte!

Foto: facebook.com/sandbanksdorset

Ein kan sjå mange rare former om du studerer skyene lenge nok. Men har du nokon gong sett ein tru kopi av Ole Brumm på himmelen?

Bildet av den mildt sagt spesielle skya vart lagt ut på Facebook-sida til staden Sandbanks i Storbrittania, skriv Side2.no torsdag.

Historia har sidan blitt plukka opp av både Daily Mail og The Telegraph, og blitt delt og likt i tusental på sosiale media.

Dei norske meteorologane meiner dessverre den høgtflygande Ole Brumm'en er for god til å vere sann.

– I høgste grad unaturleg

Når vi viser bildet av sky-Ole Brumm til meteorologane på vêrvarslingssalen på Blindern kjem svaret unisont: FAKE!

Det er rett og slett for godt til å vere sant, meiner meteorologane. Stig Carlsson har jobba som vêrobservatør i det han sjølv seier er «litt for mange år», og har aldri sett noko liknande.

– Vi såg på dette bildet alle mann, og vi var einige at det såg i høgste grad unaturleg ut.

Det er slett ikkje første gong vêrobservatøren og kollegaene på Meteorologisk institutt får servert bilde av skyer i spesielle former.

– Ein kan gjerne innbille seg at ei sky liknar litt på ditt eller datt, men når det er ein tru kopi så er det litt usannsynleg. Eg har sett bilde av skyer som er tru kopi av Jesus og slikt, humrar den erfarne vêrobservatøren.

Vakthavande meteorolog Bente marie Wahl seier seg einig med den erfarne vêrobservatøren.

– Men ein treng nok ein god grafiker for å slå fast om det faktisk er ekte eller ikkje!

Ole Brumm på facebook

STOR ENTUSIASME: Bildet av Ole Brumm-skya fall godt i smak på Facebook-sida det vart delt på.

Foto: Facebook.com/sandbanksdorset

Jubilant på himmelen

Ifølge The Telegraph dukka skya visstnok opp på magisk vis under eit velgjerdsarrangement for hjartesjuke barn i Dorset.

– Kom han for å sei hei til barna? Spør avisa humoristisk i bildeteksten.

Den velkjende bjørnen og dei andre karakterane frå Hundremeterskogen vart skapt av forfattaren A.A. Milne for akkurat 90 år sidan i år.

Derfor er det er ganske freistande å tenke at jubilanten faktisk dukka opp i skyversjon, men Bente Marie Wahl gir oss ikkje altfor mykje håp:

Bente Wahl

SKEPTISK: Statsmeteorolog Bente Marie Wahl har ikkje trua på at Ole Brumm-skya er heilt ekte.

Foto: MAGNE VELLE

– Hadde det vore ekte hadde nok skya vore litt meir trevla i toppen, litt meir sånn trådar som heng. ut. Det er litt for perfekt! Eg trur det nok ikkje før eg ser det sjølv, slår meteorologen fast.

Men ekte eller ei: Har du nokon gong sett ei sky som likna skikkelig på noko? Del gjerne bilde med oss på emneknaggen #yrno på Instagram, eller send inn på Yr.no/bilder!