Kva er eigentleg dis?

Du har sett det frå fly, i badstua, eller når du pustar i kulden. Sjekk forskjellen mellom tåkedis, tørrdis og smog!

Dis

DIS: Det ser ut som tåke, men tåke er enda tjukkare og sikta dårlegare. Dette bilete tok yr-brukaren på flyturen til Portugal.

Foto: yr-bruker

På ein flytur over Europa til Portugal i sommar, blei Michael vitne til nedsett sikt som følgje av dis. Yr-brukaren lurer på kva dis består av.

Svaret er at dis kan oppstå av fleire grunnar. Når dis oppstår som følgje av høg luftfukt blir det kalla tåkedis.

Når dis oppstår som følgje av luftforureining blir det kalla tørrdis, eller smog når lufta blir helsefarleg.

Tåkedis

Tåkedis er eigentleg berre små vassdropar i lufta. Dette er eit vanleg fenomen i naturen, og oppstår når kald luft blir blanda med varmare luft.

Tåkedis kan også oppstå når ein pustar ute i kulden om vinteren, eller inne i varmare omgjevnader i ei badstue.

Ved tåkedis er sikta meir enn 1 kilometer. Blir sikta mindre enn 1 kilometer, blir det ikkje lenger kalla tåkedis men tåke.

Russia Winter Swimmers

VINTERBADING: Frostrøyken som du ser på bildet, kallast tåkedis.

Foto: Dmitry Lovetsky / AP

Tørrdis

Tørrdis oppstår som følgje av støv og røyk og andre industrielle partiklar som senkar sikta. Tørrdis oppstår, som namnet hintar om, i tørr luft.

Dette står i motsetning til tåkedis som krev fuktig luft for å oppstå. Tørrdisen har ofte ein brunaktig farge sett på avstand, medan tåkedisen har ein meir blåaktig farge sett på avstand.

Smog

Når det er så liten sirkulasjon i lufta at konsentrasjonen av partiklar i lufta blir helsefarleg, blir tørrdisen også kalla smog. Dette er eit vanleg problem spesielt i Asia, men kan også oppstå i Noreg om vinteren ved inversjon.

Ved inversjon er det svært liten luftsirkulasjon ved bakken, som dermed tillèt at luftforureining samlar seg opp og senkar sikta her.