Kor ligg eigentleg snøgrensa?

Grunnen til forvirringa rundt snøgrensa er gjerne basert på ulik definisjon blant folk om kva som faktisk er snøgrensa.

Snø som smeltar på bakken

Meteorologane varslar snøgrensa ut i frå der det er venta å falle nedbør som snø i lufta.

Det ikkje noko krav hos meteorologane at snøen skal verte verande som snø etter at den treff bakken. Ein grunn til dette er at når det snør, blir sikta kraftig redusert i høve til nedbør som regn, og dette kan ha stor betydning for mellom anna flytrafikken.

Snø som vert verandre på bakken

Mange definerer snøgrensa som høgda der snøen som fell, vert verande som snø etter at den har treft bakken.

Denne snøgrensa kan vere eit stykke høgare enn der det faktisk har vore snø i lufta, men der snøen altså har tint når den har truffe bakken.

Det betyr at denne snøgrensa er sterkt avhengig av tilstanden til bakken. Når bakken er varm, for eksempel seint om hausten/tidleg vinter, vil ikkje snøen som fell bli liggande før temperaturen i lufta nærmar seg frysepunktet. Men om bakken er kald, feks om våren, kan denne snøgrensa bli lågare enn kva tilfellet ville ha vore om hausten når bakken var varm.

Store intervall

Eit vanleg varsel frå meteorologane høyres gjerne ut som dette:

«regnbyer, snøbyer over 400-600 m»

At meteorologen brukar eit så stort intervall kjem av at tekstvarselet skal dekke eit heilt fylke, og at temperaturtilhøva kan varierer ein del innforbi eit fylke, dermed også snøgrensa. Normalt sett er snøgrensa lågast i indre strok. Ofte varierer temperaturtilhøva så mykje at meteorologen må nytte seg av fleire snøgrenser gjennom ein dag.

Er lufta fuktig eller tørr?

Omlag kva høgde nedbøren går frå regn til snø, går det an å regne ut sjølv. Men det er i denne samanhengen viktig å vete om lufta er mest fuktig (metta) eller mest tørr (umetta). Frontnedbør, altså regn, har meir metta luft, mens nedbør definert som regnbyger har meir umetta luft.

I metta luft fell temperaturen med rundt fem grader per 1000 høgdemeter, mens i umetta luft fell temperaturen med rundt ti grader per 1000 høgdemeter.

Om Yr varslar for eksempel fem grader ved havoverflata, vil regn ha ei snøgrense som er opptil dobbelt så høg som snøgrensa når meteorologen varslar regnbyer.