Normal

Kle deg i nord – sol deg i aust

Kraftig regn i nord og torevêr i sør – men Austlandet kan glede seg over nokre solfylte helgedagar.

Sol i Holmsbu

SOL: Varmast i helga vert det i Telemark, Buskerud og Oslo. Bildet er frå Holmsbu i Buskerud 9 juli.

Foto: Miriam Weierud @miriampir / Instagram

Noreg byr igjen på ein stor variasjon vêr denne helga. Nord vert prega av kraftig regn, sør kan få torevêr, og midt og vest i landet vert skya og tidvis vått. Men det gleder statsmeteorolog Martin Granerød å kunne gje nokre gode meldingar for helga:

– Austlandet er både dagens vêrvinnar – og vert helgas vêrvinnar. Dei kan vente seg dagar med mykje sol, seier han.

Laster Twitter-innhold

Shortsvêr for austlendingar

– På Austlandet ser vêret bra ut for fredag og laurdag. Der får dei mykje sol og lite regn, men det kan kome nokre skyer fredag ettermiddag og nokre ettermiddagsbyer laurdag, fortel Granerød.

På Austlandet er dei kanskje så heldige at kortbuksa kan erstatte langbuksa; temperaturmessig er det også dette området som kjem best ut. Varmast vert det i Oslo, Telemark og Buskerud.

– Indre strøk av Telemark og Buskerud kan kome opp i 23 grader, og Oslo rundt 21 grader, slik prognosane ser ut no.

– Oslo går ofte igjen som varmare enn andre på Austlandet – kva er grunnen til dette?

– Det er fordi bykjernen med mykje asfalt gir ekstra oppvarming samanlikna med område der skog og gras dominerer, forklarar meteorologen.

Martin Granerød

MELDER HELGA: Statsmeteorolog Martin Granerød gir deg helgevêret.

Foto: Kamilla Pedersen / met.no

Torevêr og regnbyer

Folk i Agder-fylka og Rogaland må nok halde seg mykje innandørs i helga, då dei må bu seg på kraftig regnvêr og tore fredag formiddag og ettermiddag. Laurdag vert det tilskyande vêr.

– Vestlandet er prega av pålandsvind torsdag, som gjer at området vert skya med litt regnbyer. Fredag ser det ganske bra ut, men det er også moglegheit for regn på grunn av pålandsvinden, poengterer meteorologen.

Vestlandet er kanskje lei av regnbyer, men dei kjem ikkje dårlegast ut denne helga.

– Verst vert det i nord, opplyser Granerød.

Meteorologen fortel at på grunn av eit lågtrykk over Østersjøen og sentrale delar av Sverige, vil Nordland smake mest på regnet i denne omgang. Regnvêret vil vare samanhengande fram til natt til søndag. Troms og Finnmark ligg litt unna og får berre periodar med regn. Også Trøndelag vert påverka av lågtrykket og får regn torsdag og fram til utover laurdagen.

Våt søndag

Søndag ser det ut til at Austlandet må leite fram paraplyen og nøye seg med regn.

– I løpet av søndagen vil heile Sør-Noreg vere råka av regn.

Eit lågtrykk nær Island vil då rette snuten austover og treffe Vestlandet laurdag kveld, og resten av Sør-Noreg i løpet av søndagen.

– Skal du grille vil eg tipse om at du dag til dag sjekkar nåvarselet på mobilsidene til yr for å finne ut om byene treff deg, kommenterer han.

Nåvarsel screenshot

OVERVAKAR: Nåvarselet vil fortelje deg om regnet dei neste 90 minutt dersom regnet vil treffe området der du er.

Foto: Yr.no/nb

Oppgitt over regnvêr? Tilstandane neste veke vert kanskje betre!

– Måndag til onsdag ser vi kanskje ei lita endring i vêrsituasjonen aust og vest i landet. Situasjonen er usikker, men la oss håpe dette er tilfelle, seier meteorolog Martin Granerød.