Ingen betring i sikte for sommarvêret

Ikkje alle er like nøgde med korleis vêret oppfører seg denne sommaren. Meteorologane har fått bryne seg på å melde uføreseielege sommarbyer, og denne veka held det fram i same sporet.

– Kortversjonen er at det held fram med ustabilt vêr, slår statsmeteorolog Espen Biseth Granan fast.

Av og på-regn heile veka

På Vestlandet har det vore vått og kaldt i helga, og lågtrykka kjem framleis inn over kysten med regnskurer.

Eit lågtrykk kjem med regn allereie natt til tysdag, og regnbyene frå dette vil prege vêret

no i starten av veka. Først kjem det sør for Stad, men regnet kjem også opp nord for Stad i løpet av tysdag.

I Trøndelag kan lågtrykket også kome med nokre torebyer i tillegg til regnet.

– Onsdag ser ut til å bli best denne veka, fortel meteorolog Ida Marie Solbrekke ved vêrvarslinga i Bergen.

– Nokre byer frå lågtrykket vil framleis henge igjen, men om ettermiddagen kan det bli opphaldsvêr mange stader.

Men opplettet ser ikkje ut til å vare særleg lenge.

– Det ser ut til å bli ein ny runde med nedbør torsdag og fredag, fortel Solbrekke.

Kjølig og ustabilt i nord

Ein del skyer, regn av og til og nokre solgløtt. Ikkje det heilt store sommarvêret, oppsummerer meteorolog Magnus Ovhed i Tromsø.

Etter ei rimeleg fin helg i Nord, er regnet atter på frammarsj. Største delen av det våte

ser ut til å falle ned i Nordland.

– Pålandsvinden vil gjere at det blir ganske vått vêr, fortel Ovhed.

– Men lågtrykket kan også gjere at det blir opphaldsperiodar innimellom regnbyene, så dei fleste kan få oppleve nokre solgløtt i løpet av veka.

Det er altså ikkje heilt bekmørkt, forklarer meteorologen.

Faktisk har sommaren vi er inne i no vore turrare enn normalt, fortel Ovhed. Men den har også vore kaldare.

– Kanskje vi har litt høge forventingar etter sommaren i fjor, slår han fast.

Også vått Austafjells

Lågtrykket som kjem med blaute gåver frå oven til Vestlandet, Trøndelag og Nordland vil også prege vêret Austafjells.

Først blir det vått lengst sør, og etter kvart dreg regnet seg lenger og lenger nord.

– Turrast blir det i Telemark og Agder, fortel meteorolog Nina Larsgård i Oslo.

Og det vil bli fint innimellom. Når lågtrykket har passer kan det kome lengre periodar med sol, fortel meteorologen.

Også austanfjells ligg onsdagen an til å bli finast. Då vil det bli fint frå kysten i sør og oppover, men nokre regnbyer kan framleis henge att i Oppland og Hedmark.

– Bruk dei fint periodane mellom regnskurene, er meteorologens tips.

For enn så lenge ser vêret ut til å halde seg vekslande og ustabilt.