Himmelsk fargespel i juli

Om sommaren er både sola og menneska ekstra lenge oppe. På yr.no/bilder ser vi det igjen i dei spektakulære solnedgongane Yr-brukarane har delt med oss frå sommarkveldar rundt om i landet.

Difor blir himmelen raud

– Eit kriterium er at det ikkje er heilt overskya, og gjerne vekslande skydekke, fortel meteorolog Marit Berger.

Når sola står lågt, reiser solstrålane langt gjennom atmosfæren før dei treff oss. Sollyset er sett saman av mange fargar. Den raude delen av lyset gir farge til solnedgangen.

Les også: Slik blir skyene fargerike

– Det raude lyset har lengst bølgelengde, så det er dei som når heile vegen gjennom atmosfæren, forklarer meteorologen.

Ofte får vi dei finaste solnedgangane når sola går ned i eit skylag. Skyer er eigentleg mange knøttsmå vassdropar, som får farge når lysstrålane som treff dei blir brotne.

Lysbrytinga aukar når det er meir vatn og støv i atmosfæren, og difor kan litt skyer på himmelen gjere solnedgongen ekstra fargerik.

Bilete fra nord

I februar himmelen eksploderte i fargar på Austlandet, og det rann inn bileter av himmelen med emneknaggen #yrno.

I sommar kjem mange av bileta vi får inn frå Nord-Noreg.

– Det er jo sjølvsagt vakrast solnedgangar i nord!

Meteorolog Rune Skoglund ved vêrvarslinga i Tromsø tillet seg å bli litt Nord-Noreg patriot, men legg kjapt til at solnedgangane er vakre i sør også.

Grunnen til biletedrysset frå nord har nok ei meir enn menneskeleg forklaring enn meteorologisk, meiner Skoglund.

– Folk vil ikkje legge seg når det er midnattssol, meiner Skoglund.

– Mange har nok vore på rett stad til rett tid. Folk er veldig flinke til å ta bilete av dei fine fargane som oppstår når lyset blir brote i fuktig luft.

Nord for polarsirkelen går sola strengt tatt ikkje heilt ned om sommaren, men dei vakre fargane oppstår likevel. Det er fordi sola står lågt på himmelen om kvelden og natta.

Blant alle dei fine solbileta vi får inn på Yr, er det få soloppgangar.

– Folk er kanskje oppe så lenge at dei søv gjennom soloppgangane. Og dei kan vere like vakre som solnedgangane, er meteorologen sitt tips.