Medan sommartemperaturane lèt vente på seg fleire stader her i Norden, er det hetebølgje i andre delar av verda.
Ny varmerekord
Tysdag vart det målt heile 39,5 grader i Central Park i New York etter at ei hetebølgje skylla inn over austkysten av USA. Det er den høgaste temperaturen som er målt der nokon gong, skriv NTB.
Også i byar som Washington, Richmond og Philadelphia var det svært høge temperaturar. Heten vart beskriven som farleg, og folk vart oppfordra til å drikke vatn, opphalde seg i rom med klimaanlegg og unngå sola.
Varme asiatar
Det er ikkje berre USA som opplever hetebølgje for tida.
I Taiwan sin hovudstad, Taipei, vart det målt 38 grader onsdag 7. juli. I nordlege og sentrale delar av Kina melder meteorologane om temperaturar rundt 40 grader og minimalt med nedbør framover.
Kreativ nedkjøling
Mellom høge hus og asfalt i storbyane, tyr mange til fontener for å kjøle seg ned.I New York vart det endåtil innstallert dusjventilar på brannhydrantane for å hindre at dei vart opna på ulovleg vis!
Men du treng ikkje reise så langt for å oppleve kvelande varme.
I Europa ligg temperaturen på godt over 30 grader i mellom anna Tyskland og Italia.
